Veiði | mbl | 26.7.2019 | 17:33 | Uppfært 18:38

Laxveiðiár í Noregi loka vegna hita

Annað árið í röð kemur til lokanna í einni þekktustu laxveiðiá Noregs. Nú er lokunin ótímabundin þar til aðstæður lagast. Áin er 20 gráður og lofthiti 32 stig. Ljósmynd/FB síða Gaula

Einni þekktustu laxveiðiá Noregs, Gaula hefur verið lokað tímabundið. Ástæðan er vatnsleysi og mikil hitabylgja. Þetta var tilkynnt í gær og tók lokunin gildi á hádegi í dag og mun gilda þar til aðstæður batna. Hitastig Gaula er hátt og veðurspá gerir ráð fyrir meiri hitum og nánast ógerningur er talið að lax sem er veiddur og sleppt á nýjan leik, lifi það af.

Norski fiskifræðingurinn Eva B. Thorstad sagði í tísti í dag að þetta væri afar óvenjulegt. Ástæðan væri hár hiti og vatnsleysi vegna hversu veðurlag hefur verið þurrt og heitt lengi. Í dag er hitastig Gaula 20 gráður og lofthiti 32. Búist er við meiri hlýindum og hitamet hafa verið að falla. Gaula er ein af stærstu laxveiðiám Noregs og hefur lax aðgang að 212 kílómetra svæði. Í fyrra veiddust þar 5.100 laxar og var sleppihlutfall 62%. Eva segir einnig að ár á stórum svæðum í bæði Noregi og Svíþjóð séu vatnslitar og afar heitar. Hún segir að komið hafi til lokana í stöku ám í Noregi áður en aldrei jafn mikið og núna. Þá berast einnig fréttir af lokunum á veiðisvæðum í Danmörku sökum veðuráhrifa. Þetta er annað árið í röð sem Gaula lokar tímabundið vegna þurrka og hita. Í fyrra gerðist það 28. júlí.

Ragna Sif Þórsdóttir með fallegan lax úr Víðidalsá. Hún átti að hefja veiðar í Noregi í gær en ánni Stjordal hefur verið lokað tímabundið. Ljósmynd/Aðsend

„Auðvitað er ég hundsvekkt“

Ragna Sif Þórsdóttir, hönnuður og veiðikona var á leið til Noregs í fyrramálið og átti að hefja veiðar í laxveiðiá í ánni Stjordal á Fossen svæðinu. Þriggja daga veiðitúr var framundan og fékk hún upplýsingar í gær um að ánni hefði verið lokað tímabundið vegna þurrka og mikilla hita. „Auðvitað er ég hundsvekkt. En það er svo sem ekkert að gera við þessu. Bara sýnir okkur hversu slæmt ástandið er. Þeir voru búnir að senda okkur tölvupóst að koma bara með einhendur og sleppa tvíhendunum. Vanalega er þessi á veidd með 14 feta tvíhendum að minnsta kosti.“

Þetta er annað árið í röð sem laxveiðiár í Skandinavíu verða illa úti í miklum hitum og þurrkum. Minnir óneitanlega á það ástand sem ríkir á Vestur hluta Íslands í sumar.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.