Þegar laxveiðin er skoðuð eftir landshlutum kemur í ljós að norðausturhornið sker sig úr. Þannig er veiði í Selá virkilega góð og á sama tíma er Hofsá að skila ágætri veiði og er fiskur dreifðari en menn hafa átt að venjast síðustu ár. Í Selá eru menn að skila allt að þrjátíu löxum í bók á dag og í Hofsá er veiðin oft í kringum tíu laxar á dag. Þegar síðustu veiðitölur birtust um miðja vikuna var Selá komin yfir 600 laxa og var með mestu vikuveiðina af öllum ám á landinu. Hofsá var þá komin í 325 laxa og var vikuveiðin 93 laxar.
Ingólfur Helgason hjá Veiðiklúbbnum Streng sem leigir árnar segir að vatnsstaða hafi verið með ágætum í sumar og geti þeir ekki kvartað yfir því. „Veiðin í Selá er mjög fín. Hvort hún verður meiri en í fyrra er erfitt að segja en menn eru sáttir hér. Varðandi Hofsána þá er bara ágætur gangur þar. Fiskur vel haldinn og við erum að sjá í báðum ánum nokkuð af smálaxi,“ sagði Ingólfur í samtali við Sporðaköst.
Sunnudalsá hefur skilað 53 löxum á tvær stangir en áin opnaði fyrir þremur vikum. Þá vekur veiðin í Miðfjarðará í Bakkafirði mikla athygli. Þar eru komnir á land 134 laxar en aðeins er veitt á tvær stangir í ánni. Miðfjarðará opnar frekar seint eða um mánaðamótin júní/júlí.
Aðrar ár í námunda, svo sem eins og Hafralónsá, Svalbarðsá og Hölkná eru allar að skila ágætri veiði. Norðausturhornið hefur oft og tíðum verið á skjön við það sem gerist almennt. Þessi landshluti virðist oft lúta öðrum lögmálum en aðrir landshlutar. Að þessu sinni er þetta svæði að skila mun betri veiði en gerist víða annars staðar.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |