Langþráð rigning á norðvesturlandi lífgaði talsvert upp á veiðina þó sumar ár hefðu hlaupið í flóð og voru óveiðandi á tímabili.
Að sögn Rafn Alfreðssonar leigutaka Miðfjarðarár í Húnavatnssýslu tók veiðin verulegan kipp í kjölfarið á mikilli úrkomu og eru núna að veiðast 20 til 30 laxar á hverri vakt frá því að rigna tók á sunnudaginn. Vesturá og Núpsá sem fóru hvað verst út úr langvarandi þurrkum og voru orðnar nánast óveiðandi eru farnar að gefa laxa.
Vesturá hefur verið að gefa um 20 laxa á dag frá því að rigna fór og eru laxarnir byrjaðir að dreifa sér vel upp eftir ánni fiskar og farnir að veiðast ofarlega í ánni, til dæmis í Orrustuhyl, Sandgili og Guðnavörðuhyl.
Þá hefðu fyrstu laxarnir á sumrinu veiðst í Núpsá á þriðjudaginn þegar sitt hvor laxinn veiddist í Efri Núpsfossi og Svarthyl. Núpsá væri búin að vera óveiðandi í allt sumar sökum vatnsleysis og munaði miklu um að fá hana inn núna.
Austurá héldi almennt vatni mun betur en hinar tvær í þurrkatíð en hefði litast nokkuð í kjölfarið á vatnsveðrinu. Hún væri þó yfirleitt fljót að jafna sig en verið nánast óveiðandi eina vakt.
Talsvert mikið af svokölluðum 90 plús fiskum eru að veiðast á hverri vakt, allt að 95 cm, tveir stærstu laxar það sem af er væru 100 cm.
Rafn sagði að hins vegar væri ljóst að heilt yfir væri mun minna af fiski í ánni nú í ár en sumrin þar á undan. Þurrviðrið og vatnsleysið fram eftir sumri hefði gert ástandið illt verra hvað það varðar.
Hilmar Hansson og félagar sem eru á veiðum í Hrútafjarðará lönduðu í gær 19 löxum á þrjár 3 stangir. Níu af löxunum voru stórir, frá 81 til 95 cm.
Þá virðist sem eitthvað að rigningunni hafi náð inn í vötnin á sunnanverðri Arnarvatnsheiði því í Kjarrá í Borgarfirði tóku menn eftir að vatnsmagnið lagaðist lítillega og var 18 löxum landað þar í gær sem er langbesti dagur á sumarsins.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |