Veiði | mbl | 14.8.2019 | 22:54 | Uppfært 15.8.2019 5:53

Stærsti lax sumarsins veiddist í dag

Ingvi Örn Ingvason lukkulegur með 110 sentimetra lax af Hólmavaðsstíflu. Þetta er stærsti lax sumarsins, enn sem komið er. Ljósmynd/Aðsend

Stærsti lax sumarsins veiddist í dag á því rómaða stórlaxasvæði Nesi í Laxá í Aðaldal. Fiskurinn mældist 110 sentimetrar að lengd og 56 sentimetrar að ummáli. Hann er talinn vera 31 pund. Hinn lukkulegi veiðimaður er Ingvi Örn Ingvason og leiðsögumaðurinn hans var Ari Hermóður Jafetsson. Fiskurinn veiddist á þeim þekkta veiðistað Hólmavaðsstíflu og tók hann þyngdan Sunray shadow.

Á Facebook-síðu sinni lýsir Ingvi Örn upplifuninni og lýkur þeirri lýsingu með orðunum; „Hversu magnað! Lífið er yndislegt.“

Þessi síðdegisvakt í Nesi í Laxá var hreint út sagt mögnuð. „Mesta stórlaxavakt sumarsins,“ sagði Árni Pétur Hilmarsson rekstrarstjóri Nessvæðisins í samtali við Sporðaköst í kvöld.

Á kvöldvaktinni veiddust 93 sentimetra lax, einn 96 og hundrað sentimetra fiskur og svo risalaxinn sem mældist 110 sentimetrar og mælist 31 pund samkvæmt þeim kvarða sem Nesmenn styðjast við.

Selá yfir þúsund laxa

Virkilega góð veiði er í Selá þessa dagana og fór áin yfir þúsund laxa á kvöldvaktinni í kvöld. Er hún fyrsta náttúrulega laxveiðiáin sem brýtur þann múr. Heildartalan í kvöld fór í 1.002 laxa.

Jón Þór Ólason formaður SVFR náði einum hundrað sentimetra í dag. Ljósmynd/Aðsend

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.