Næst stærsti lax sumarsins, til þessa veiddist í morgun á Nesveiðum í Laxá í Aðaldal. Það var Johnny Leadsom sem setti í fiskinn með dyggri aðstoð Björgvins Krauna Viðarssonar, leiðsögumanns. Fiskurinn mældist 109 sentímetrar og umgjörð 54 sentímetrar. Þessi mikli fiskur tók í Presthyl, sem er annálaður stórlaxastaður eins og raunar margir veiðistæðir á Nessvæðinu.
Í samtali við Sporðaköst sagði Krauni að þetta hefði verið svakalega flottur fiskur. „Þetta er sá stærsti sem ég gædað í og veiðimanninum gekk illa að halda á honum, hann var svo stór. Við mælum hann 29 ensk pund.“
„Við höfðum orðið varir við fisk í Presthyl og ég var að veiða af bát. Krauni vildi færa okkur aðeins nær landi og í þriðja kasti tók hjá mér lax. Hann strekkti í og rauk svo af stað af svaka krafti. Eftir nokkra stund tók fiskurinn enn eina rokuna sjálfsagt einhverja fimmtíu metra og sneri sér svo á hliðina og þá sáum hvað hvers konar skepna þetta var í raun og veru,“ sagði Johnny í samtali við Sporðaköst.
Flugan sem stóri hængurinn tók var lítil Sunray Shadow. Johnny viðurkennir að hann hafi verið mjög stressaður á lokamínútunum þegar Krauni var að gera sig kláran að háfa fiskinn. „Við áttuðum okkur á strax í upphafi að þetta væri góður fiskur en hann reyndist töluvert stærri en við reiknuðum með. Síðustu andartökin var ég á nálum hvort við myndum landa honum eða ekki og hvort taumurinn myndi halda,“ viðurkennir Johnny.
Þetta er annar laxinn sem hann veiðir á ævinni. Þann fyrri veiddi hann í gær og var það sextíu sentímetra smálax, einnig á Nessvæðinu. Þetta er í annað skiptið sem Johnny kemur til Íslands að veiða lax. Í fyrri ferðinni fyrir þremur árum fór hann heim fisklaus, en nú fer hann heim með silfurnælu frá Nessvæðinu sem staðfesting á að hann hafi landað fiski yfir tuttugu pund.
Stærsti lax sumarsins veiddist einnig á Nesveiðum fyrr í sumar og mældist hann 110 sentímetrar. Þá hefur einnig komið á land 107 sentímetra lax og enn sem fyrr stendur Nes undir nafni sem mesta stórlaxasvæði Íslands.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |