Veiði | mbl | 11.9.2019 | 14:39 | Uppfært 19:10

Annar „hundraðkall“ úr Grímsá

Gunnlaugur Karl Hreinsson með hundrað sentímetra fisk úr Töðunefi í Grímsá. Ekki hefur veiðst slíkur fiskur í tuttugu ár og svo koma tveir á jafn mörgum dögum. Ljósmynd/SVB

Eftir tuttugu ára bið eftir hundrað sentímetra fiski úr Grímsá veiddist loksins slíkur fiskur í gærkvöldi. Hann veiddist í Oddstaðafljóti og mældist 101 sentímetri. Það sem meira er að hundrað sentímetra fiskur veiddist svo í morgun. Sá veiddist í Töðunefi og var veiðimaður Gunnlaugur Karl Hreinsson. Báðir þessir stórlaxar veiddust á rauða Frances með keilu.

Sigurður Veigar sem veiddi 101 sentímetra fiskinn er einmitt veiðifélagi Gunnlaugs og þeir báðir búnir að landa slíkum merkisfiski.

Leigutakar Grímsár staðfestu í gær að ekki hefði veiðst svo stór fiskur í tvo áratugi. Það er því magnað þegar þessi múr er loks rofinn að tveir slíkir fiskar veiðist á jafn mörgum dögum.

„Þetta var svakalegur fiskur. Hann negldi fluguna og lagðist strax. Sigurður Veigar hjálpaði mér að landa og þetta var svo þykkur og sterkur fiskur. Þetta var bara rosalegt,“ sagði mjög kátur Gunnlaugur í samtali við Sporðaköst nú fyrir skömmu.

Sigurður Veigar með 101 sentímetra fiskinn sem veiddist í Grímsá í gær. Ljósmynd/GKH

Jón Þór Júlíusson, framkvæmdastjóri Hreggnasa ehf. sem leigir Grímsá, sagði í samtali við Sporðaköst að þeir hefðu séð þessa fiska síðustu ár en ekki tekist að veiða þá. Hann gladdist mjög yfir því að þessi múr hefði verið rofinn.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.