Veiði | mbl | 13.9.2019 | 18:59

Leikarinn landaði fyrsta flugulaxinum

Kátur á góðri stund. Þorsteinn Bachmann með fyrsta flugulaxinn. Gleðin er við völd. Ljósmynd/MÞH

„Leikarahollið“ í Mýrarkvísl landaði átta löxum og missti annað eins. Þorsteinn Bachmann landaði sínum fyrsta flugulaxi og var í skýjunum. Halldór Gylfason og Hilmir Snær Guðnason voru einnig í hollinu og nutu sín vel. „Þetta voru ekki allt leikarar,“ segir Matthías Þór Hákonarson leigutaki. En þetta var gaman og menn nutu sín vel.

Halldór Gylfason hampar fallegum fiski. Okkar maður er yfir sig ánægður. Ljósmynd/MÞH

Þeir félagar Þorsteinn, Hilmir og Halldór voru við tökur á kvikmyndinni Síðustu veiðiferðinni í Mýrarkvísl í sumar og langaði að koma aftur og veiða ána. Það gekk mjög vel og sérstaklega var Þorsteinn Bachmann ánægður enda landaði hann sínum fyrsta flugulaxi á ævinni. Sporðaköst náðu örstutt í Þorstein sem var að fara á milli staða. „Ég elska Mýrarkvísl.“ Svo var hann rokinn.

Sumarið hefur verið ævintýralegt í Mýrarkvísl miðað við síðasta sumar. „Í fyrra vorum við með rúmlega sjötíu laxa í bók en í dag eru þeir orðnir 127. Ég er að vonast til að við tvöföldum veiði síðasta árs og förum í 140 til 150 laxa. Það er svo sem ekkert stórkostleg veiði, en að ná því á þessu erfiða sumri er magnað, finnst mér,“ sagði Matti í samtali við Sporðaköst í kvöld.

Hann segir að sér hafi komið á óvart hversu mikið sé af tveggja ára fiski í Mýrarkvísl. Þannig hefur tveimur fiskum yfir hundrað sentímetra verið landað í sumar.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.