Veiði | mbl | 26.9.2019 | 14:33 | Uppfært 18:59

Erfitt að velja bestu veiðimyndina

Veitt í svarta myrkri. Jakob Sindir er hér með urriða sem eftirlíkingu af mús. Segist hafa veitt mikið af urriða á slíka flugu í sumar. Ljósmynd/Arnar Sveinbjörnsson

Myndir frá veiðifólki, frá liðnu sumri streyma inn og ljóst að dómnefndar bíður erfitt hlutverk. Hér eru nokkrar skemmtilegar myndir sem hafa borist í samkeppni Sporðakasta og Veiðihornsins um bestu veiðimyndina 2019. Verðlaunin eru ekki af verri endanum eða Sage X stöng frá Veiðihorninu að verðmæti 129.900 kr. Skilafrestur er til 10. október, þannig að nægur tími er til stefnu. Sendið myndir á netfangið eggertskula@mbl.is.

Fyrsta myndin sem við birtum hér er mynd sem Jakob Sindri Þórsson sendi inn. Myndasmiður er Arnar Sveinbjörnsson. Jakob Sindri lét þessa orðsendingu fylgja með.

„Hef verið að veiða á mýs á nóttinni á Þingvöllum. Fékk þennan fína urriða í svartamyrkri í september sem mældist 68 cm. Myndina tel ég merkilega fyrir þær sakir að ég þekki ekki til þess að margir veiði á mýs á Íslandi. Ég veit að þó nokkrar mýs leynast í fluguboxum veiðimanna og eru aldrei bleyttar. Kannski hreyfir myndin við veiðimönnum að prófa slíkar flugur meira.“

Skemmtileg mynd sem sýnir langþráðan lax koma á land í vatnsleysinu í Kjarrá í sumar. Ljósmynd/Eric Koberling

Inga Lind Karlsdóttir sendi inn mjög skemmtilega mynd af dóttur sinni að slást við lax í Kjarrá, á veiðistaðnum Hellgate. Eins og myndin ber með sér er sú stutta afar ákveðin. Inga Lind sendi þennan texta með.

„Hér liggur Jóhanna Hildur, 11 ára dóttir mín, á bökkum Kjarrár í sumar, dottin í grjótið eftir baráttu við langþráðan lax í vatnslítilli ánni, en alls ekki af baki dottin! Hún sleppir ekki takinu, stöngin uppi og allt í gangi - og laxinn samt kominn á land. Jóhanna er mjög ákveðinn veiðimaður sem gefst aldrei upp.“

Ungur og upprennandi. Ellefu ára með fallega sjóbleikju úr Fjarðará. Þetta er hann Sveinn Jónsson. Ljósmynd/Jón Egill Sveinsson

Þá er það mynd af ungum og efnilegum veiðimanni með sinn stærsta fisk, til þessa. Inn sendi myndina Jón Egill Sveinsson og texta með.

„Hér eru mynd af efnilegum 11 ára veiðimanni, Sveini Jónssyni með sjóbleikju sem hann fékk í lok júlí í Fjarðará. Hann kastaði lítilli púpu andstreymis með tökuvara og hann var á í öðru kasti. Stöngin 9 feta Sage X 5. Bleikjan var 68 cm og stærsti fiskur sem gutti hefur sett í og landað - enda kátur að sjá.“

Hér er tekist á við stóran urriða í Helluvatni í sumar. Augnablikið fangað. Ljósmynd/Eiður Kristjánsson

Þessi er frá Helluvatni og fangar augnablikið þegar fallegur urriði hreinsar sig. Eiður Kristjánsson sendi þessa mynd. „Myndin er tekin í Helluvatni í vor. Þetta reyndist vera 57 cm urriði sem tók fluguna Burton.“

Stóra-Laxá, svæði fjögur. Þar er stórbrotin náttúrufegurð og ekki spillir fyrir að setja í lax. Ljósmynd/Bergur Árni

Síðasta myndin sem við birtum í dag er frá fallegum veiðistað í Stóru-Laxá. Bergur Árni sendi myndina og útskýringu.

„Myndin er tekin í Stóru-Laxá á svæði fjögur. Þetta er veiðistaðurinn Neðri nálarhylur og veiðimaður er Nökkvi Svavarsson að glíma við 79 cm hrygnu sem náðist á land.“

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.