Mikil aukning á stórum birtingi

Sjóbirtingsveiði er nú víðast hvar lokið eða að ljúka. Veiðin á hefðbundnum svæðum hefur verið góð og sérstaka athygli vekur hversu mikið hefur verið um stóra sjóbirtinga. Sá stærsti sem Sporðaköst hafa fengið fregnir af veiddist í Vatnamótunum í haust og var hann sléttir hundrað sentimetrar.

Veiði er lokið í Eldvatninu í Meðallandi og veiddust þar tæplega fimm hundruð fiskar. Þar af var sjóbirtingur í miklum meirihluta eins og lög gera ráð fyrir. Samkvæmt samantekt leigutaka Eldvatnsins veiddust 463 sjóbirtingar, sautján laxar og fjórar bleikjur. Í samantektinni sem birtist á Facebook-síðu Eldvatnsins má sjá að ríflega hundrað fiskar voru á bilinu 70 - 79 sentimetrar. 39 fiskar voru á bilinu 80 - 89 sentimetrar og þrír stærstu mældust 90, 93 og 95 sentimetrar.

Hestabóndinn Hafliði Þ. Halldórsson búinn að taka birtinginn úr plastinu. Hann áætlar að fiskurinn hafi verið búinn að vera um mánuð í ánni. Þetta er hans stærsti birtingur en fáir þekkja Vatnamótin jafn vel og Hafliði. Ljósmynd/Aðsend

Svipuð staða er uppi í Tungulæk en þar veiddust 260 sjóbirtingar árið 2019. Tíu stærstu fiskarnir eru á bilinu 86 sentimetrar upp í 94 sentimetra og var það fjölmiðlakonan Inga Lind Karlsdóttir sem landaði þeim stærsta, eins og kom fram í Sporðaköstum á sínum tíma. Veiðin í Tungulæk var að stærstum hluta í efsta veiðistaðnum, Breiðunni. Þar veiddust 214 af 260 sjóbirtingum. Nobblerar voru áberandi bestu flugurnar og var samtals 56 birtingum landað á svartan og appelsínugulan Nobbler.

Veiði í Vatnamótum og Geirlandsá var einnig mjög góð í vor og í haust og í ár var töluvert sem veiddist af sjóbirtingi í Rangánum í sumar og var nokkuð um fiska í yfirstærð.

Telja verður líklegt að bæði Tungulækur og Eldvatn njóti góðs af veiða/sleppa fyrirkomulaginu, en alþekkt er að sjóbirtingar geta hrygnt ár eftir ár. Aukið hlutfall stórfiska er áberandi á báðum þessum vatnasvæðum.

• Blogga um frétt

Seinustu hundraðkallar sumarsins