Nú er rétt vika í að fyrsti rjúpnaveiðidagurinn renni upp. Veðrið er alltaf stærsti áhrifavaldurinn þegar kemur að veiði og þá sérstaklega rjúpnaveiði. Langtímaspár eru nú farnar að ná yfir fyrstu rjúpnahelgina. Sporðaköst settu sig í samband við Einar Sveinbjörnsson veðurfræðing og spurðu út í horfurnar þessa fyrstu daga veiðitímabilsins.
„Ég var einmitt að skoða þetta. Spárnar eru nokkuð samhljóma fram á fimmtudag. Eftir það eykst óvissan og það er nú gjarnan þannig eftir sjötta dag að þá eykst hún. Stundum nær maður að sjá þær á svipuðum nótum aðeins lengur og jafnvel fram á áttunda eða níunda dag. Það er spáð mjög rólegu veðri í næstu viku og er útlit fyrir á föstudag að hann snúist úr suð-vestan yfir í austan átt. Þá verður nokkur vindur á suð-austurlandi og einhver rigning en almennt séð bjart og gott veður. Það verður að öllum líkindum um frostmark á láglendi og eitthvert frost til fjalla, alla vega um norðanvert landið,“ sagði Einar Sveinbjörnsson um veðurhorfurnar. Hann rekur veðurvefinn blika.is og þar er hægt að skoða staðbundnar spár sem veiðimenn ættu að hafa í huga þegar nær líður og á sjálfri vertíðinni.
En Einar er búinn að rýna enn frekar í langtímaspána og segir að þrjár sviðsmyndir séu í kortunum þegar horft er til laugardags og sunnudags, sem eru annar og þriðji nóvember.
„Þessar sviðsmyndir eru mjög ólíkar en allar jafn líklegar. Góðu fréttirnar eru kannski þær að líkur á endurteknu norðanhreti eins og við höfum kynnst í þessari viku, eru mjög litlar. Það eru metnar þriðjungs líkur á því að austanáttin sem kemur næsta föstudag, að hún haldi yfir helgina og þá með ágætis veðri allavega á norðanverðu landinu og Vestfjörðum. Það eru líka þriðjungs líkur á því að hann snúist í sunnan átt með hlýindum og þá nokkuð vindasamara veðri. Því myndi þá fylgja nokkur úrkoma sunnan og vestan til. Svo eru tæplega þriðjungs líkur á því að það verði hæðarhryggur hér yfir og hægviðri og bjartviðri víðast hvar.“
Hvaða sviðsmynd er líklegast að verði ofan á þessa daga?
„Yfirleitt er það þannig að ein sviðsmyndin rís upp úr en það er ekki raunin með þessa helgi. Þær eru í raun allar jafn líklegar. En ef maður skoðar baksvið þessara spáa og fer aðeins dýpra þá sést óróleiki koma fram í bylgjuganginum í háloftunum yfir landinu, einmitt þegar líður á vikuna. Veðrið getur því farið í ýmsar áttir og því treysti ég mér ekki til að veðja á eina þeirra umfram hinar. Útilokunaraðferðin hins vegar segir okkur þó ýmislegt. Líkur á norðan kasti og snjókomu eru álitnar mjög litlar.“
Þannig að miðað við allt og allt þá lítur þetta bara ágætlega út?
„Já ég myndi segja það. Það er spáð mjög fínu veðri næstu daga, sérstaklega á sunnudag og mánudag. Norðan áttin fyrir austan gengur ekki niður fyrr en á morgun en svo gerir fínasta veður. Þetta hefði verið mjög fínt veður ef fyrsta veiðihelgin hefði verið núna,“ sagði Einar.
En þá vita menn það. Útlit fyrir skaplegt veður, auðvitað svæðis bundið en litlar líkur á einhverjum hvelli. Þá er bara að fara að huga að gallanum og útbúnaðinum og vera klárir í slaginn.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |