Hofsá og Selá með fimm hvor í morgun

Veiði hófst í Hofsá og Selá í Vopnafirði í morgun. Að sögn Gísla Ásgeirssonar hjá Veiðiklúbbnum Streng voru skilyrði eins og best verður á kosið, gott veður og vatn í rúmlega meðallagi í báðum ánum. Í Hofsá var fimm löxum landað á morgunvaktinni og nokkrir misstir.

Julia Ratcliffe tekst á við fyrsta laxinn í Selá. Hann kom á land með dyggri aðstoð Gísla Ásgeirssonar. Ljósmynd/Aðsend

Svo skemmtilega vildi til að í Selá var líka fimm löxum landað og nokkrir misstir. Julia Ratcliffe veiddi þann fyrsta í Selá. Í Hofsá landaði Albert Jónsson 93 cm hæng í Fossi 2. Mest voru þetta tveggja ára laxar og vel haldnir.

Selá var ein aflahæsta laxveiðiáin í fyrra og með einna mestu veiði per stöng. Seiðamælingar í fyrra voru mjög jákvæðar fyrir báðar árnar og má búast við góðum smálaxagöngum.

• Blogga um frétt

Seinustu hundraðkallar sumarsins