Nýjar flugur og nýjar litasamsetningar á flugum eru mörgum veiðimanninum hugleiknar. Alltaf spennandi þegar nýjung bætist í boxið. Einn af þeim sem hafa náð góðum árangri í að hanna veiðnar flugur er Hilmar Hansson. Nýjasta afkvæmi hans er flugan Valgerður. Raunar vill hann kalla fluguna Eiðinn en sennilega eru of margir búnir að bóka á Valgerði þannig að vandséð verður að snúa þeirri nafngift niður.
Fyrstu laxarnir veiddust á Valgerði í Norðurá snemma í mánuðinum. Þá var ekki búið að skíra fluguna en þar sem þeir félagar voru að veiða í Norðurá, Hilli og Sigurður Héðinn „Haugur,“ fengu þeir símtal frá Sporðaköstum. Þeir sögðu frá nýju flugunni og góðri veiði. „Það var ekkert búið að skíra fluguna, en það óð svo á Haugnum í samtalinu að hann skírði hana Valgerði. Og það er einfaldlega vegna þess að við vorum að tala um Framsóknarflokkinn og Kárahnjúka,“ sagði Hilli í samtali við Sporðaköst og brosti. Þannig að flugan er skírð í höfuðið á Valgerði Sverrisdóttur, fyrrverandi iðnaðarráðherra.
Flugan og sú litasamsetning sem hún hefur upp á að bjóða hefur þegar sannað sig. Hilli, sem er hönnuðurinn, segir að rekja megi þessa flugu til The Banana Fly. „Ég var alveg heillaður í fyrra af Bananaflugunni af því að hún virkaði svo vel í Noregi þannig að ég setti þessa saman í vetur, og sannarlega tengist hún forveranum þó að skyldleikinn blasi kannski ekki við.“
Þeir félagar fengu fimm laxa á Valgerði í Norðurá. Hilli fékk lax á hana í Sandá og einnig hefur veiðst á hana í Langá og víðar.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |