Urriðafoss er kominn yfir 500 laxa og Norðurá yfir 300. Gríðarlegur bati er í öllum ám miðað við hörmungarsumarið 2019. Víða er veiði í takt við meðaltal síðasta áratugar, þó auðvitað sjáist sveiflur í einstökum ám, í laxveiðinni.
Landssamband Veiðifélaga birtir vikulegar veiðitölur á miðvikudögum, vef sínum angling.is. Stutt er síðan margar ár opnuðu en hver vika gefur betri mynd af þróun veiðinnar. Ljóst er að Urriðafoss í Þjórsá er á miklu flugi og Norðurá var komin í 312 laxa í gærkvöldi. Rangárnar skríða hægt og örugglega upp listann yfir aflahæstu árnar og er Eystri í þriðja sæti með 163 laxa. Ytri Rangá er í fimmta sæti með 128 laxa, nokkuð á eftir Þverá/Kjarrá og Haffjarðará. Raunar eru ekki komnar tölur fyrir síðustu viku úr Þverá/Kjarrá.
Ef horft er á veiði í Straumunum sést glögglega hversu síðasta sumar var afleitt. Lokatala á þessu tveggja stanga svæði í fyrra var 56 laxar. Nú eru komnir á land 76 fiskar. Straumarnir gefa góða mynd af göngum í Norðurá.
Elliðaárnar voru í gærkvöldi komnar með 53 laxa, Langá var með 93, Blanda 81 svo einhverjar séu nefndar. Miðfjarðará byrjar rólegar en undanfarin ár og þar voru í gærkvöldi komnir áttatíu laxar. Hún á mikið inni miðað við það magn af fiski sem sést hefur. Hofsá, Laxá í Aðaldal og Víðidalsá er allar á svipuðu róli með hálfan fimmta tug.
Eins og fyrr segir vantar enn nokkrar tölur fyrir nýliðna viku í nokkrum ám, en ljóst er að næstu vikur munu skila einhverjum hástökkvurum þegar tími smálaxins gengur í garð.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |