Falleg saga feðgina í Jöklu II

Af og til berast Sporðaköstum veiðisögur frá fólki. Hér er ein slík sem Pétur G. Broddason sendi okkur. Hann fór til veiða í Jöklu II ásamt dóttur sinni og gerðu þau frábæra veiði. Hér fylgir sagan.

Auður kominn með annan lax og vaktin var hreinlega frábær hjá þeim mæðginum. Ljósmynd/Aðsend

„Ég fór þangað í gær, 18.ágúst, ásamt dóttur minni, Auði Kristínu Pétursdóttur. Við feðginin hófum veiði klukkan 8 og veiddum til klukkan 13. Á þessum tíma settum við í tólf laxa og lönduðum átta. Jökla 2 er gríðarlega skemmtilegt, fallegt og krefjandi veiðisvæði með flottum hyljum og breiðum. Þröstur Elliða er svo sannarlega að gera flotta hluti í Jöklunni.

Jökla 2 er ótrúlega fallegt svæði Ljósmynd/Aðsend

Auður Kristín fekk sinn fyrsta lax á flugu í Jöklu og bætti um betur og tók þrjá til viðbótar. Við lönduðum löxum frá 60 til 84 sentímetrar að lengd. Mikið af fiski var á svæðinu. Þegar stangir voru komnar saman, hjól og taumar á, bað ég Auði um að velja sér flugu úr fluguboxunum. Veiðimaðurinn verður jú að hafa trú á agninu sjálfur. Auður valdi sér fluguna Bóbó nr 14, sem Hilmar Hansson hnýtti. Hver hefði getað ímyndað sér að veiðimenn ættu eftir að hitcha og veiða á flugur af stærðinni 14 í Jökulsá á Dal? Bóbó er nú upphalds fluga Auðar, og jökla uppáhaldsáin. Ég læt fylgja með nokkrar myndir úr veiðiferðinni."

Þau feðgin lentu í veislu eins og aðrir veiðimenn sem voru í Jöklu enda var landað 35 löxum í Jöklu, Þetta var metdagur í ánni að sögn facebooksíðu Veiðiþjónustunnar Strengja sem eru með Jöklu á leigu. Nú styttist í yfirfall í Jöklu en hver dagur telur. 

• Blogga um frétt

Seinustu hundraðkallar sumarsins