Þúsundasti laxinn úr Selá í sumar

Ásdís Kristjánsdóttir lenti í miklu ævintýri í morgun þegar hún landaði laxi þúsundasta laxinum úr Selá, þetta sumarið. Laxinn var heldur engin smásmíði, 96 sentímetra glæsilegur hængur. Hann tók rauða Frances númer 16 á gullkrók í töfrastaðnum Brúarbreiðu, sem er neðarlega í ánni. Baráttan stóð yfir í fimmtíu mínútur, með rokum, stökkum og skemmtilegheitum. Laxinn hélt á vit frekari ævintýra að lokinni viðureigninni.

Leiðsögumaður Ásdísar var Denni eða Sveinn Björnsson, sá mikli laxahvíslari.

„Veiðin í Selá hefur gengið frábærlega það sem af er sumri og það var frábært að þúsundasti fiskurinn skyldi vera svona veglegur,“ sagði Jóhann Gunnar Arnarson matreiðslumeistari í veiðihúsinu í Selá í samtali við Sporðaköst.

Kaka dagsins. Með áletrun í tilefni af þúsundasta laxinum. Ljósmynd/Butlerinn

Selá er með allra vatnsminnsta móti og þannig hefur Denni leiðsögumaður ekki séð hana svo vatnslitla á sínum tuttugu ára ferli við ána. Þetta hefur leitt til þess að fiskur er minna dreifður en mörg önnur ár og bunkast í lykilstaði.

Skreyting við hæfi. Frances á gullkrók. Ljósmynd/Butlerinn

Í tilefni dagsins skellti Jóhann Gunnar, eða Butlerinn eins og hann er jafnan kallaður í köku fyrir veiðimenn og gesti. Hún var af dýrari sortinni og skartaði áletrun og veiðistöng og á þeirri stöng var að sjálfsögðu Frances á gullkrók.

• Blogga um frétt

Seinustu hundraðkallar sumarsins