Gömlu laxveiðiþættirnir birtir á mbl.is

Árið 1988 gerði fyrirtækið Bergvík fjóra þætti um laxveiðiár á Íslandi. Fyrir valinu urðu Miðfjarðará, Laxá í Dölum, Laxá í Kjós og Vatnsdalsá. Átta árum síðar bættist svo fimmta áin í safnið og var þá myndað í Elliðaánum.

Margir af eldri veiðimönnum ólust upp við þetta sem eina efnið sem í boði var um laxveiðiár. Þættirnir voru gefnir út á VHS myndböndunum sem var miðill þess tíma.

Laxá í Dölum var mynduð 1988. Margt er breytt. Ljósmynd/mbl

Nú hefur mbl.is samið um birtingu á þessum myndböndum og verða allar fimm myndirnar aðgengilegar hér á síðu Sporðakasta á mbl.

Friðrik Þór Friðriksson annaðist myndstjórn og þulur var Hallgrímur Thorsteinsson. Í myndinni um Miðfjarðará var Rafn Hafnfjörð þulur. Myndin um Elliðaárnar sem tekin var upp 1996 var gerð undir stjórn Ásgeirs Ingólfssonar og er hann jafnframt þulur.

Vatnsdalsármyndin er mögnuð og þar má sjá æsispennandi viðureign við stórlax með tilheyrandi hlaupum og spenningi. Ljósmynd/mbl

Þessar myndir eru miklar heimildir um fyrri tíð. Allt er breytt. Veiðireglur, veiðitækni, veiðibúnaður, hugarfar, fatnaður og fleira og fleira. Eitt er þó óbreytt og það er ástríðan fyrir veiðinni og hún kemur vel í gegn í þessum myndum.

Nokkrir af þeim sem koma fram í myndunum eru látnir en vonandi eru þessar myndir falleg minning um mikla veiðimenn.

Laxá í Kjós á gullaldarárunum. Hér er meðal annars Tóti tönn í essinu sínu að maðka í Höklunum. Ljósmynd/mbl

Auðvitað eru gæðin ekki sambærileg við það sem við þekkjum í sjónvarpi nútímans, en það er eitthvað sem má sætta sig við.

Þættirnir birtast einn af öðrum hér á næstu dögum.

Elliðaárnar í leiðsögn Ásgeirs Ingólfssonar er fimmta og síðasta myndin í seríunni. Ljósmynd/mbl

• Blogga um frétt

Seinustu hundraðkallar sumarsins