Veiði | mbl | 16.9.2020 | 9:09

Veiðibörn og veiðistemning

Fiskflutningar á vegum Orra Daníelssonar. Þetta gekk vel. Myndin er tekin á Iðunni í sumar. Ljósmynd/Jón KBS

Hér birtum við nokkrar af þeim myndum sem borist hafa í veiðisamkeppnina sem mbl., Veiðihornið og Sporðaköst standa fyrir. Margar afar skemmtilegar myndir hafa borist og sú fyrsta í dag er af ungum veiðiáhugamanni sem stendur í fiskflutningum. Þegar maður er ekki hár í loftinu geta smálaxar verið bara afskaplega stórir og þörf er á vörubíl til að flytja þá. Þessi lax veiddist á Iðunni í sumar og stútfyllti vörubílinn. Orri Daníelsson dó ekki ráðalaus við að flytja þennan fisk. Myndasmiður er Jón KBS.

Beðið eftir þeim stóra á Hrauni í Ölfusi. Þolinmóði veiðimaðurinn er Erika Anna Bjartmarsdóttir. Ljósmynd/Bjartmar Guðjónsson

„Beðið eftir þeim stóra“ heitir þessi mynd. Hér er Erika Anna Bjartmarsdóttir við veiðar á Hrauni í Ölfusi og tekur því afskaplega rólega en veit hún sem er að sá stóri á leið framhjá, bara spurning hvenær. Myndasmiður er Bjartmar Guðjónsson.

Lax stekkur í Affallinu á ágústkvöldi. Ljósmynd/Halldór Jóhann Sveinsson

Þá er komið að sannkölluðum stemmara frá því í sumar. Lax var að stökkva í Affallinu. Myndin er tekin í ágúst að kvöldi til þegar sumarið er aðeins farið að gefa eftir. Affallið er ein af þeim ám sem hafa gefið hörkuveiði í sumar. Myndasmiður er Halldór Jóhann Sveinsson.

Ingólfur Davíð og hundurinn Hængur fylgjast spenntir með laxi í viðureign í Svalbarðsá í sumar. Ljósmynd/Daði

Loks er það stórlaxakóngurinn Ingólfur Davíð Sigurðsson. Hann hefur veitt stærsta lax sumarsins til þessa, en það var í Vatnsdalsá í síðustu viku í Vaðhvammi. Sá lax mældist 108 sentímetrar. Hér er hann hins vegar við veiðar í Svalbarðsá og mágur hans tók þessa mynd af honum og hundinum Hæng. Myndasmiður er Daði.

Skilafrestur er til 1. október

Í sumar veitum við verðlaun fyrir fjóra flokka mynda. Þeir eru eftirfarandi: Ungir veiðimenn, Veiðikonur, Stórir fiskar og loks Veiðimynd ársins.

Vegleg verðlaun verða veitt í hverjum flokki:

Ungir veiðimenn – Redington-krakkafluguveiðipakki.

Veiðikonur – Simms G3 Guide Gore-tex-dömuveiðijakki.

Stórir fiskar – Mclean-háfur með innbyggðri vigt.

Veiðimynd ársins – Sage Igniter-einhenda.

Allar myndir sem sendar eru til þátttöku eru gjaldgengar og mun dómnefnd skipuð reynsluboltum, bæði í veiði og ljósmyndun, fara yfir og meta hvern flokk fyrir sig.

Þær myndir sem sendar eru inn er heimilt að birta í árlegu riti Veiðihornsins, Veiði 2021, og/eða öðrum auglýsingum Veiðihornsins. Með því að senda mynd samþykkir ljósmyndari slíka notkun á henni.

Senda skal myndirnar í góðri upplausn á netfangið eggertskula@mbl.is. Greina skal frá hvar myndin er tekin og hvað var að gerast. Þá er nauðsynlegt að fá nöfn þeirra sem eru á myndinni og ekki síst hver tók hana, því það er sá sem hlýtur verðlaunin ef vel tekst til.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
101 cm	Vatnsdalsá	Erlendur veiðimaður	29. september 29.9.
101 cm	Eystri-Rangá	Grzegorz Loszewski	27. september 27.9.
105 cm	Hvítá við Iðu	Katrín Tanja Davíðsdóttir	24. september 24.9.
101 cm	Víðidalsá	Jón Eðvald Halldórsson	22. september 22.9.
107 cm	Grímsá	Jón Jónsson	22. september 22.9.
101 cm	Miðfjarðará	Agnar Sigurjónsson	22. september 22.9.
101 cm	Hvítá við Iðu	Gunnar Pétursson	20. september 20.9.