Magnaðar myndir af urriðum í Öxará

Fjöldi fólks lagði leið sína á Þingvelli í dag til að fylgjast með urriðadansinum í Öxará þar sem urriðinn er að hrygna um þessar mundir. Einn þeirra sem mættu á staðinn er góðkunningi Sporðakasta Cezary Fijalkowski.

Á svona degi, þegar er logn og sól er eins og að horfa í gegnum gler á þessa tignarlegu fiska. Ljósmynd/CF

Cezary er magnaður veiðimaður og hefur gert frábæra veiði á stórurriða í Þingvallavatni í mörg ár. Hann veiðir fyrst og fremst í þjóðgarðinum og hefur landað tugum urriða sem eru níutíu sentímetrar og stærri. Stærsti fiskur sem hann hefur fengið mældist 103 sentímetrar og var það árið 2016.

Par sem er tilbúið til að tryggja nýja kynslóð. Ljósmynd/CF

Sjálfsagt hefur farið um marga af þessum urriðum þegar þeir sáu Cezary munda símann. En án efa hefur hann veitt einhverja þeirra og sleppt þeim.

Einhverjir af þessum urriðum hafa áður kynnst Cezary. Ljósmynd/CF

Aðstæður til að fylgjast með urriðanum voru eins og best verður á kosið í dag. Logn og sól. þá er skyggnið frábært eins og sjá má á myndunum sem Cezary sendi Sporðaköstum.

• Blogga um frétt

Seinustu hundraðkallar sumarsins