Það hefur verið sannkölluð urriðaveisla á hinu rómaða ION-svæði í Þingvallavatni. Veiði hefur ekki hafist svona snemma áður. Nú var opnunardagurinn 1. apríl en áður var miðað við 15. apríl. Einn af þeim sem tók þátt í veisluhöldum í Þorsteinsvík og Ölfusvatnsárósi er Nils Folmer Jörgensen. Fyrstu tveir veiðidagarnir gáfu yfir 130 urriða.
„Ég hef ekki veitt svona snemma á svæðinu en þetta er búið að vera hreint alveg magnað. Það kom mér á óvart hversu aktívur fiskurinn er og að bæði svæðin séu inni. Ég handlék og sleppti sautján urriðum á fyrsta einum og hálfa klukkutímanum í gær. Svo hætti hann allt í einu að taka. En miðað við að við erum að tala um byrjun apríl, þá get ég ekki beðið eftir að sjá hvað verður hér í boði þegar kemur fram í maí sem er besti tíminn, oftast,“ sagði Nils í samtali við Sporðaköst.
Sterkasta flugan í morgun var Olive Ghost og hefur þessi fluga verið að gera frábæra hluti í Þingvallavatni og víðar síðustu árin. Þessi verður að vera í boxinu þegar farið er í urriða.
Opnunardagurinn á ION skilaði 60 urriðum og í gær var 75 landað, sem er hreint út sagt mögnuð veiði. En aðstæður á svæðinu eru frá náttúrunnar hendi frábærar. Volgar uppsprettur gera það að verkum að urriðinn leitar inn á svæðið til að hraða meltingu í hlýrra vatni og má því oft sjá hann í stærðarinnar torfum.
Veiði á öðrum urriðasvæðum í Þingvallavatni hefur verið ágæt. Kárastaðir hafa verið að gefa flotta fiska. Næstu dagar líta ekki alveg jafn vel út, veðurspáin gerir ráð fyrir mikilli kólnun og víða mun frjósa í lykkjum hjá veiðimönnum næstu daga.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |