Síðustu dagar hafa verið afar gjöfulir á mörgum sjóbirtingssvæðum. Má þar nefna Tungulæk, Eldvatn, Tungufljót og Vatnamót en öll þessi svæði eru í Vestur-Skaftafellssýslu. Þá hafa einnig borist góðar fréttir af öðrum þekktum sjóbirtingssvæðum.
Laxá í Kjós hefur að geyma vaxandi sjóbirtingsstofn og þar hefur verið hörkuveiði síðustu daga. Á þeim tíu dögum sem leyft hefur verið að veiða í Kjósinni er búið að landa 133 birtingum. Stórveiðihjónin Stefán Sigurðsson og Harpa Hlín Þórðardóttir lönduðu tuttugu fiskum í Kjósinni í gær. Sterkustu staðirnir eru eins og svo oft í Kjósinni þegar kemur að sjóbirtingi, Álabakkar og Káranesfljót.
Þá hefur Húseyjarkvísl verið að gefa fantaveiði þegar veður er með betra móti. Sterkasta flugan í kvíslinni hefur verið Iða Fishskull. Stærsti birtingur til þessa í vor mældist 79 sentimetrar og veiddist í veiðistað númer 21.
Ef við kíkjum í fleiri veiðibækur þá má sjá að Eldvatn er búið að gefa 130 birtinga og er sá stærsti 92 sentimetrar og veiddist hann í Villa, sem er veiðistaður sem hefur gefið ótrúlega marga stórfiska í vor. Þrír birtingar hafa mælst 90 sentimetrar og yfir. Fjölmargir fiskar eru á bilinu áttatíu til níutíu. Sterkustu flugurnar í Eldvatni í vor eru púpurnar Copper John og svo „Hyls“-útgáfan af þeirri púpu eða Blue Magic Copper John, eins og þeir félagar Sigþór og Birkir Mar kalla hana.
Í Tungulæk er búið að færa til bókar um 200 birtinga. Sá stærsti stóð þriggja stafa tölu og greindum við frá honum á sínum tíma. Hundrað sentimetra birtingur er afar sjaldséður. En hann tók Green Dumm og það var Theodór K. Erlingsson sem landaði þeim mikla fiski. Tröllið tók í veiðistaðnum Súdda en annars er það Holan sem hefur gefið langflesta fiska, eða 94.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |