„Þetta tók ekki langan tíma. Hann tók eftir fimm sekúndur,“ sagði Stefán Sigurðsson, lukkulegur eftir að hafa landað fyrsta laxi sumarsins í morgun, 77 cm, þykkum nýrenningi við Urriðafoss í Þjórsá.
Stefán Sigurðsson hjá Iceland Outfitters er leigutaki svæðisins við Urriðafoss, hann renndi maðkinum út í strenginn á mínútunni klukkan átta og þremur mínútum síðar var laxinn í háfnum.
Harpa Hlín Þórðardóttir, sem einnig er leigutaki svæðisins, náði skömmu síðar 93 sentímetra hæng. Fisknum var sleppt að lokinni myndatöku.
„Ég náði ekki einu sinni að reima á mig skóna,“ sagði félagi hans sem háfaði laxinn.
„Þetta er geggjaður fiskur, spikfeitur og vel fram genginn,“ sagði Einar Haraldsson bóndi á Urriðafossi sem fylgdist kátur með. Einar spáir góðri veiði í sumar og stórlaxa-sumri.
Veitt er á tvær stangir á svæðinu sem Iceland Outfitters er með á leigu. Veiðin hófst klukkan átta eins og áður sagði og tók aðeins fimm sekúndur að fá fyrsta laxinn. Mikill hugur er í veiðimönnum enda mikið af fiski í ánni. Mikill beljandi er í Urriðafossi og hann vatnsmikill.
Stangveiði við Urriðafoss hófst sumarið 2017 og hefur frá fyrsta degi notið mikilla vinsælda. Hefur netum síðan verið fækkað við jarðir í ánni og veiðar á stöng teknar upp á sífellt fleiri svæðum.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |