Nokkrar af þekktustu laxveiðiánum á Íslandi voru opnaðar í morgun. Veiði hófst í Miðfjarðará, Laxá í Kjós og Eystri-Rangá. Tveir laxar komu á land í Kjósinni við einstaklega erfiðar aðstæður. Haraldur Eiríksson leigutaki segir að menn hafi tekið morguninn rólega enda ekki besta veiðiveðrið.
„Aðstæður voru bara skelfilegar. Við fórum út í þrjár til fjórar gráður og norðanfræsing. Við fórum seint út og sáum slatta af fiski og Laxfoss geymir nokkuð af fiski og Kvíslarfoss líka. Auðvitað eiga eftir að koma stundir þar sem við gerum eitthvað, en við hreyfðum ekki fisk fyrr en fór að hlýna. Norðanáttin datt aðeins niður rétt fyrir hádegi og þá náðu veiðimenn tveimur í Kvíslarfossi,“ sagði Haraldur í samtali við Sporðaköst.
Báðir laxarnir voru smálaxar, 61 og 65 sentímetrar og annar var lúsugur. Það var Þóra Hallgrímsdóttir sem veiddi fyrsta laxinn í Kjósinni í ár og tók hann mikrótúbu.
Siggi Hall eldar í Kjósinni að nýju og tvær reglur hafa nú verið endurvaktar; laxasúpa í hádegi á opnunardegi og hangikjöt á þjóðhátíðardaginn, 17. júní.
Eins og staðan er núna er vitað um einn landaðan í Eystri-Rangá. Hann kom á land í Tóftarhyl og tveir voru misstir.
Myndir hafa birst frá Miðfjarðará á facebook með fyrsta laxinum.
Það er staðfest að tveir laxar komu á land í Eystri–Rangá á þessari fyrstu vakt. Eins og fyrr segir veiddist fiskur í Tóftarhyl og annar í Mjóanesi.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |