Spennandi opnunardagur í Stóru 1 og 2

Veiði byrjar á góðum nótum í Stóru–Laxá í Hreppum. Fyrst var svæði fjögur opnað og endaði opnunarhollið í átján fiskum sem er mun betra en í fyrra. Svæði 1 og 2 opnaði í dag og var ellefu fiskum landað fyrir hádegi. Seinni vaktin var rólegri en lokatalan fyrir opnunardaginn endaði í fimmtán löxum.

Skemmtileg veiðimynd. Laxinn ekki alveg farinn eftir sleppingu en veiðimaðurinn telur þessu lokið. Ljósmynd/SMG

Veiðimenn sem Sporðaköst ræddu við í kvöld voru sammála um að töluvert magn væri af laxi á svæðinu fyrir ofan Laxárholt. Þá eru ánægjulegar fréttir að Kálfhagahylur er aftur kominn inn og fengust laxar þar í dag. Svona skiptist veiðin fyrsta daginn. Stuðlastrengir gáfu sjö laxa. Bergsnös gaf þrjá, Kálfhagahylur sömuleiðis. Brúarbreiða og Stekkjarnef einn.

Sigurður Marcus Guðmundsson með flottan fisk sem veiddist í gær. Ljósmynd/FMS

Árni Baldursson leigutaki sagði í samtali við Sporðaköst í kvöld að það væri honum sérstakt ánægjuefni að Kálfhagahylur væri aftur dottinn inn og mölin úr honum hefði hreinsast burt. „Já, ég sé að þetta er töluvert betri opnun en í fyrra og gaman að því,“ sagði Árni. Rétt áður en við kvöddum hann sagði hann. „Það er ganga.“

Friðjón Mar Sveinbjörnsson, eigandi Veiðiflugna á Langholtsvegi tekst á við einn fullorðinn. Friðjón hafði betur. Ljósmynd/SMG

Stórlaxinn var í aðalhlutverki eins og oft er á þessum tíma árs. Þrír laxanna voru smálaxar en allir hinir voru áttatíu plús.

Stutt er síðan að net fóru niður í Ölfusá og Hvítá sem er gönguleið laxins upp í Stóru–Laxá. Nú hafa hins vegar nokkrar netalagnir verið keyptar upp á svæðinu af og ljóst að fleiri fiskar munu finna leið á uppeldisstöðvar í sumar, en áður.

• Blogga um frétt

Seinustu hundraðkallar sumarsins