Fyrstu laxarnir veiddust í Vatnsá, sem fellur úr Heiðarvatni, skömmu eftir mánaðamót. Vatnsá er mikil síðsumarsá og er veitt í henni fram í október. Fyrstu þrjú hollin í sumar settu í laxa en lönduðu ekki. Þeim fyrsta var landað 3. ágúst og þann dag komu tveir á land.
„Slatti af laxi hefur sloppið og töluvert af birtingi hefur verið að veiðast og má búast við að straumurinn sem nú fer að koma skili inn fyrstu göngunum. Árið í fyrra var sérstakt fyrir það hve snemma laxinn gekk, en nú virðist allt vera eins og áður, þegar laxar byrjuðu að veiðast í meira mæli upp úr 10. ágúst og allt fór á flug í lok ágúst,“ sagði Ásgeir Arnar Ásmundsson í samtali við Sporðaköst. Ásgeir er umsjónaraðili með Vatnsá og Heiðarvatni.
Hann bendir á að á árunum 2004 til 2018 hafi síðasta vikan í ágúst til 10. september oft gefið um fjörutíu prósent af veiðinni og rest komið eftir það til loka veiðitímans.
„Það sem kemur kannski ekki á óvart í þessu er að birtingurinn er seinni í ár en oft áður og það skýrist líklega af mjög köldu vori. Birtingurinn gekk út fram í júlí og byrjaði að ganga aftur til baka í lok júlí. En það er bara rétt að byrja göngutímabilið í sjóbirtingnum og það gæti byrjað með næsta straumi sem væri þá hálfum mánuði seinna en í fyrra,“ sagði Ásgeir.
Nýtt veiðihús er við Vatnsá og segir Ásgeir því hafa verið afar vel tekið af veiðimönnum.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |