Loksins kom rigning í Kjósina. Laxá í Kjós gaf 32 laxa í fyrradag og tólf í gær. Eftir að rigndi loksins og Laxá komst í kjörvatn í fyrsta skipti í langan tíma, stóð ekki á veiðinni.
Fiskur var um alla á og það sem meira er, hann var í tökustuði um allt. 44 laxar á tveimur dögum í Kjósinni jafngildir um átta prósentum af sumarveiðinni til þessa.
Margar ár eru búnar að vera afar vatnslitlar í sumar og eiga inni hvað varðar veiðina. Laxá í Dölum er til dæmis þekkt fyrir góðan endasprett og er þá bundin við haustrigningar. Þar hefur ekki enn rignt en það er svipað og að spila í lottóinu að kaupa leyfi í Dölunum síðsumars eða á haustdögum. Þar er hægt að vinna stóra vinninga ef menn hitta á rigningu sem gerir það að verkum að laxinn lætur sig loksins vaða upp í ána og þeir sem eru fyrir fá súrefni.
Þá hafa líka verið að veiðast bolta sjóbirtingar í Kjósinni og eru þeir mikill bónus fyrir veiðimenn. Sérstaklega eru breskir veiðimenn hrifnir af því að geta veitt sjóbirting á hábjörtum degi því þeir eru vanari að veiða þá þegar rökkrið færist yfir.
„Mér finnst líka merkilegt að nú erum við að finna loksins fiskana sem komu snemma og þeir eru orðnir vel legnir og við erum að sjá aðeins meira af stærri fiski. Það var hressileg rigning í gærkvöldi hjá okkur og ég tel að Kjósin eigi mikið inni í veiðitölum,“ sagði Haraldur Eiríksson leigutaku Laxár í Kjós í samtali við Sporðaköst.
Sama gildir í mörgum ám og verður spennandi að fylgjast með ef rigning heiðrar vestanvert landið. En Kjósin naut góðs af hressilegri rigningu í gær og þá gerðust þeir hlutir sem svo margir veiðimenn hafa beðið eftir.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Laxá í Dölum | Hafþór Jónsson | 27. ágúst 27.8. |
102 cm | Haukadalsá | Ármann Andri Einarsson | 23. ágúst 23.8. |
103 cm | Laxá í Aðaldal | Birgir Ellert Birgisson | 12. ágúst 12.8. |
103 cm | Miðsvæði Laxá í Aðaldal | Máni Freyr Helgason | 11. ágúst 11.8. |
101 cm | Laxá í Aðaldal | Agnar Jón Ágústsson | 10. ágúst 10.8. |
101 cm | Laxá í Aðaldal | Richard Jewell | 9. ágúst 9.8. |
100 cm | Laxá í Aðaldal | Björgvin Krauni Viðarsson | 9. ágúst 9.8. |