Hvar var besta veiðin í laxi 2021?

Hvar var besta veiðin í sum­ar? Með ein­föld­um út­reikn­ing­um er hægt að svara því. Heild­ar­fjöldi laxa í laxveiðiá seg­ir ekki nema brot af sög­unni. Við ákváðum að reikna þetta með þeim hætti að finna út meðaltal veiddra laxa á stöng á dag. Við deil­um svo í þá tölu með fjölda veiðidaga sem er á flest­um stöðum í kring­um 90 dag­ar. Þá skýrist mynd­in og hægt að sjá hvar besta veiðin var.

Andakílsá fer í efsta sæti, raunar eins og í fyrra. Þessi litla tveggja stanga á gaf 518 laxa í sumar. Hún var að skila tæplega þremur löxum á stöng á dag. Það er hörkuveiði. Urriðafoss er í öðru sæti, þó svo að þaðan hafi ekki borist tölur frá því seint í ágúst. Miðfjarðará er í þriðja sæti og Laxá í Dölum tekur fjórða sætið í þessum útreikningum. Haffjarðará í því fimmta. 

Frá Urriðafossi. Egill Guðjohnsen og Tóti tönn, Þórarinn Sigþórsson tannlæknir mðe bjartan vorfisk úr Þjórsá. IO Veiðileyfi

Miðfjarðará er með tvo laxa á stöng á dag. Það þýðir að hver veiðimaður þar í sum­ar veiddi á þrem­ur dög­um að meðaltali sex laxa, að því gefnu að hann hafi verið einn á stöng. Á móti kem­ur að hafi sami veiðimaður farið í Laxá í Aðal­dal, sem er með hlut­fallið 0,37 lax­ar á stöng á dag, hefði hann mátt bú­ast við að ná rúm­lega ein­um laxi á þrem­ur dög­um. Það hefði líka samkvæmt meðaltalinu gert það að verkum að félagi hans fékk engan.

Hér að neðan er list­inn yfir árn­ar þar sem miðað er við veiði á dag­stöng. Þessi listi er unn­inn út frá upp­lýs­ing­um á angling.is, eins og töl­urn­ar standa núna. Lands­sam­band veiðifé­laga held­ur úti þeim vef. Flest­ar ár eru bún­ar að birta loka­töl­ur en engu að síður tök­um við þenn­an lista nú sam­an. Reikni­formúl­an er ein­föld. Fjöldi stanga í viðkom­andi á deilt með fjölda veiddra laxa. Við tök­um þetta enn lengra og deil­um í með 90, sem er fjöldi veiðidaga í flest­um ám. Þá kem­ur út hver veiðin er á stöng á dag að meðaltali. Það er hinn raunsanni mæli­kv­arði á hversu mik­il veiðivon var í ein­stök­um ám. Hér er ekki tekið til­lit til verðs, þjón­ustu, tíma­bils eða slíkra þátta. Ein­göngu er horft á töl­ur. 

Einn af mörgum löxum í Miðfjarðará. Gunnar Baldur Norðdahl veiddi þennan lax í Hlaupunum í Austurá. Ljósmynd/Aðsend

Þar sem enn er nokkuð eft­ir af veiðitíma í Rangán­um eru þær ekki tekn­ar inn í þenn­an út­reikn­ing. Þá er líka vert að hafa í huga að upp­gef­inn fjöldi stanga er tek­inn af angling.is en þar geta hafa orðið breyt­ing­ar. Má nefna að í Miðfjarðará er veitt á sex stang­ir fyrri hluta veiðitím­ans og myndi það hækka hlut­fallið þar veru­lega, væri tekið til­lit til þess. Sama má segja um Laxá í Döl­um en þar er veitt á fjór­ar stang­ir fram­an af veiðitím­an­um. Þá er líka vert að hafa í huga með Jöklu að þar náðist engan veginn níutíu daga veiðitími og hlutfallið þar því í raun hærra en þessi reikniformúla gefur til kynna.

Veiðisvæði               Fjöldi laxa       Fjöldi stanga     Á stöng       Á dag

Andakílsá                         518                2               259            2,88

Urriðafoss                       823                 4               205            2,29

Miðfjarðará                   1.796               10               180            2,00

Laxá í Döl­um                 1.021               6                170             1,89

Haffjarðará                     914                 6                152            1,70

Laxá á Ásum                   600                4                 150            1,66

Leirvogsá                         279               2                 139            1,55

Laxá í Lei­rár­sveit             814                6                 136            1,51

Laxá í Kjós                     1.059               8                132            1,47

Selá í Vopnafirði              764                6                 127            1,41

Hrútafjarðará                   372               3                 124            1,38

Elliðaár                           617                6                 103            1,14

Þverá/​Kjar­rá                  1.377               14               98              1,10

Norðurá                         1.431              15                95             1,06

Grímsá                              756               8                 95            1,05

Víðidalsá                            737               8                92            1,02

Straumfjarðará                   370               4                92            1,02

Hofsá í Vopnaf.                   601               7                86            0,95

Hauka­dalsá                       366                5                73            0,81

Vatns­dalsá                         427                6                71           0,79

Langá                               832               12               69            0,77

Hítará                                584                8                68           0,76 

Jökla                                   540               8                67           0,75

Blanda                               418                8                52            0,58

Laxá í Aðal­dal                      401              12                33           0,37

Vert er að benda á fleiri ár. Mýrarkvísl með hlutfallið 0,50. Búðardalsá sú litla tveggja stanga á gaf að meðaltali á stöngina 0,61 lax á hverjum degi. Svo er hægt að fara inn á angling.is og finna sína á og reikna út þetta hlutfall. En listinn er ansi frábrugðinn þeim lista þar sem eingöngu er horft til heildartölu, óháð fjölda stanga.

• Blogga um frétt

Seinustu hundraðkallar sumarsins