Síðasti dagur veiðitímans er að kveldi kominn og nú geta menn hugað að geymslu á stöngum hjólum og línum og öðru því sem lagt verður nú í geymslur, skúra og hillur. Í Ytri-Rangá sem er aflahæsta áin á Íslandi í ár er lokatalan, 3.437 laxar, 223 urriðar og sjóbirtingar og ein bleikja rataði í bók.
Erfið skilyrði voru síðustu dagana. Hvassviðri og hálfgert skítviðri. Þó var aðeins kropp síðustu dagana og var það heldur meira í Eystri ánni þessar allra síðustu veiðistundir. Lokatalan í Eystri-Rangá er 3.274 laxar, að sögn Jóhanns Davíðs Snorrasonar, framkvæmdastjóra Kolskeggs sem rekur Eystri.
Ef horft er til veiði á stöng á dag, þá er Ytri-Rangá með hlutfallið 1,90 per stöng á dag en 2,02 per stöng per dag þegar horft er á Eystri-Rangá. Þannig að fleiri laxar veiddust í Ytri, en veiðivonin var betri í Eystri. Hins vegar er hér aðeins reiknað með 90 daga veiðitíma en hann er að sjálfsögðu mun lengri í báðum ánum.
Heildarveiðin í Ytri var mun betri en í fyrra. 2020 gaf hún 2.642 laxa. Hins vegar var Eystri langt frá því að vera hálfdrættingur miðað við risaárið í fyrra sem gaf 9.070 laxa.
Ef horft er á hlutfall stórlaxa hefur Eystri vinninginn og það umtalsvert. Hlutfall af tveggja ára laxi var mjög lítið á móti ríflega þrjátíu prósent í Eystri.
Affallið endaði í 508 löxum, Þverá í 168 og Hólsá gaf 371. Allt tölur sem eru langt undir því sem veiddist í fyrra.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |