Hundurinn beit í línuna og dró laxinn

Þórður Þórkelsson læknir lenti í skemmtilegu en ofurlítið stressandi ævintýri á Gíslastöðum í Hvítá fyrir skemmstu. Hann setti í stórlax og fékk óumbeðna aðstoð frá labradortík. Þórður segir að sér hafi hreinlega ekki orðið um sel þegar að tíkin Díana sem er fimmtána mánaða gömul stakk sér til sunds þegar hann var að þreyta stórlax. „Ég var sem betur fer með sterkan taum og stóran öflugan krók. Díana sá laxinn skammt frá landi og þegar laxinn varð var við hana þá tók hann roku út aftur. Þar kom hann aftur í yfirborðið og tíkin með það sama stakk sér til sunds. Hún var vör við línuna og virtist greinilega tengja að laxinn væri á línunni. Hún var komin töluvert langt út og náði línunni í kjaftinn og beit um hana og byrjaði að synda í land til mín með hana,“ sagði Þórður í samtali við Sporðaköst.

Edda Björk Þórðardóttir, eigandi Díönu og dóttir Þórðar náði að mynda atvikið og fylgir myndbandið fréttinni. Nokkuð vindhljóð er á því en heyra má að Edda er hissa og stressuð. Þau feðgin voru bæði áhyggjufull um að afskipti Díönu myndu leiða til þess að fiskurinn tapaðist. En öflugur búnaður sem Þórður var með gerði það að verkum að allt fór vel. Laxinn mældist 93 sentímetrar og tók fluguna Dollý sem Einar Páll Garðarsson hannaði og sagt hefur verið frá hér á Sporðaköstum.

Þegar atvikið var rætt við Þórð sagði hann að engu líkara hefði verið en að rótgróið eðli labradorsins hefði komið upp í tíkinni við að sjá laxinn synda frá veiðimanni og út í dýpið. Hann fletti upp upplýsingum um labradorinn og hvernig hann var ræktaður á sínum tíma og til hvers. Á síðunni pethealhnetwork.com fann hann upplýsingar sem styðja við þetta.

„Labrador Retriver eru þekktir fyrir góða sundfærni, sem kemur meðal annars til af sundfitum sem þeir eru með. Tegundin á rætur sínar að rekja til Nýfundalands og Labrador, þar sem forfeðurnir voru notaður til hjálpar við veiðar. Sóttu þeir fiska sem losnuðu úr veiðarfærum og voru notaðir til að draga net,“ segir um labradorinn á þeirri síðu. Kemur það heim og saman við hegðun Díönu þegar hún aðstoðaði við löndunina á stórlaxinum.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
101 cm Vatnsdalsá Erlendur veiðimaður 29. september 29.9.
101 cm Eystri-Rangá Grzegorz Loszewski 27. september 27.9.
105 cm Hvítá við Iðu Katrín Tanja Davíðsdóttir 24. september 24.9.
101 cm Víðidalsá Jón Eðvald Halldórsson 22. september 22.9.
107 cm Grímsá Jón Jónsson 22. september 22.9.
101 cm Miðfjarðará Agnar Sigurjónsson 22. september 22.9.
101 cm Hvítá við Iðu Gunnar Pétursson 20. september 20.9.

Skoða meira

Fleira áhugavert
Fleira áhugavert