Fyrsti vorlaxinn veiddur í Skotlandi

Fyrsti vorlaxinn veiddist í ánni Tay í Skotlandi í gær. Þetta var fallegur 19 pundari og silfurbjartur með lús. Laxveiðin hófst í stærstu á Skotlands í byrjun viku. Við greindum frá opnuninni en enginn nýrenningur veiddist á opnunardegi.

Það var því mörgum gleðiefni þegar fyrsti vorlaxinn kom á land á Upper Scone svæðinu í Tay en það svæði þykir spennandi þegar kemur að fyrstu göngunum.

Það var á þriðja degi sem fyrsti vorlaxinn veiddist. Mikið vatn var í Tay og kalt. Nokkrir niðurgöngulaxar veiddust fyrstu tvo dagana en mörgum var það mikið gleðiefni þegar myndir bárust af fyrsta laxinum á þessari vertíð.

Þeir kalla þá „Springers“ eða vorlax, þó að þeir séu að ganga um hávetur. Fyrir okkur sem búum við mínus tíu gráður á Íslandi er það nafn í besta falli undrunarefni. Fjórir mánuðir eru í að fyrstu laxarnir gangi í íslenskar ár.

Silfurbjartur og lúsugur. Það er svakalegur sporður á þessum fiski. Fjölmargar ár á Bretlandseyjum opna um mánaðamótin og í febrúar. Ljósmynd/Stuart

Það er hins vegar góðs viti að sjá fyrstu laxarnir eru farnir að ganga í Skotlandi. Sérstaklega á tímum þar sem þessi fiskur hefur átt mjög undir högg að sækja á öldinni. Hvort þetta veit á gott varðandi laxveiðisumarið í heild sinni, í Skotlandi eða á Íslandi er ómögulegt að segja en forvitnilegt verður að fylgjast með hvernig veiðin byrjar í Skotlandi. Margar á á Bretlandseyjum opna um mánaðamótin og þegar líður á febrúar.

• Blogga um frétt

Seinustu hundraðkallar sumarsins