Musteri íslenskrar tungu 70 ára

Þjóðleikhúsið var vígt sumardaginn fyrsta, 20. apríl 1950, 21 ári eftir að fyrsta skóflustungan var tekin. Í tilefni af 70 ára afmæli Þjóðleikhússins leitaði Silja Björk Huldudóttir til allra þeirra sem gegnt hafa stöðu þjóðleikhússtjóra og bað þau svara því: 1) Hver hafi verið mesta áskorun þeirra í starfi. 2) Af hverju þau væru stoltust í sinni leikhússtjóratíð. 3) Hvert þau teldu mikilvægi Þjóðleikhússins í samtímanum. 

Guðlaugur Rósinkranz í júní 1972 þegar hann lét af starfi Þjóðleikhússtjóra eftir 23 ára starf. mbl.is/Ólafur K. Magnússon

„Veitti mikla lífsgleði“

Guðlaugur Rósinkranz var fyrstur til að gegna stöðu þjóðleikhússtjóra. Hann var skipaður í embætti árið 1949 og gegndi starfinu til 1972 þegar hann lét af störfum sökum aldurs. Ráðning Guðlaugs kom nokkuð á óvart á sínum tíma þar sem hann var ekki menntaður á sviði leiklistar, en hann reyndist engu að síður farsæll í starfi. Guðlaugur lést 74 ára að aldri árið 1977. 

Hópur barna á leið í Þjóðleikhúsið árið 1977. mbl.is/Ólafur K. Magnússon