„Ég er bara í skýjunum“

„I Think of Angels“, hið undurfagra lag tónlistar- og þáttagerðarmannsins KK, Kristjáns Kristjánssonar, er eitt þeirra sem hljóma í nýjustu kvikmynd bandaríska leikstjórans Seans Penns, Flag Day, í flutningi hinnar þekktu söngkonu Cat Power sem heitir réttu nafni Chan Marshall. Kvikmyndin var frumsýnd á kvikmyndahátíðinni í Cannes fyrr í sumar og sannarlega engir aukvisar sem koma að tónlist myndarinnar, auk Cat Power þeir Glen Hansard og Eddie Vedder og dóttir Vedders, Olivia, syngur eitt lag og sýnir að söngrödd hennar er engu síðri en föðurins. Platan með tónlistinni kemur út í dag, 20. ágúst, á vegum Republic Records og Seattle Surf.