Kvíðin, einangruð, gagnslaus og reið

Okkur er gjarnt að lesa sögubækurnar og hrista hausinn: hvernig gat fólk verið svona vitlaust? Hvað voru forfeður okkar að hugsa, og hvað varð um skynsemi, náungakærleika og rökhugsun? Síðan lokum við bókunum, setjum þær aftur upp í hillu og hugsum með okkur hve upplýst og réttsýn við erum sjálf, og hve lánsöm við erum að vera uppi á tímum þar sem mannkynið er komið á annan og betri stað.

En raunin er að mannlegt eðli er það sama í dag og það hefur alltaf verið og heilu þjóðirnar geta farið af hjörunum eins og hendi væri veifað.

Æ oftar berast okkur fréttir sem minna á að eitthvað verulega undarlegt er á seyði í samfélögum um allan heim, og í sumum löndum mætti halda að einhvers konar allsherjargeggjun hefði gripið um sig. Geggjunin kemur fram í ofsafengnum viðbrögðum við kórónuveirunni en rót vandans liggur dýpra og ef ekki hefði verið fyrir veirufaraldurinn hefði geggjunin einfaldlega birst með einhverjum öðrum hætti.