Risanum skrikaði fótur

Sú lækkun sem varð á hlutabréfaverði Meta, móðurfélags Facebook, í síðustu viku er af slíkri stærðargráðu að nota þarf þjóðhagfræðilegan samanburð til að lesendur átti sig á hversu mikið fór í súginn.

Við opnun markaða á fimmtudag hrundi hlutabréfaverð félagsins um rösklega 26% og eins og hendi væri veifað lækkaði markaðsvirði Meta um ríflega 251 milljarð dala. Jafnast tapið á við landsframleiðslu evrópskra milljónaþjóða á borð við Tékkland og Portúgal, eða hér um bil ellefufalda landsframleiðslu Íslands.

Facebook er enn mjög verðmætt fyrirtæki og er núna metið á um það bil 660 milljarða dala en frá áramótum hefur virði félagsins rýrnað um nærri 30%. Skellurinn á fimmtudag var svo stór að aldrei áður í sögu bandaríska hlutabréfamarkaðarins hefur markaðsverð fyrirtækis lækkað um jafnháa upphæð á einum degi.