Út er komið ritverkið Líftaug landsins. Saga íslenskrar utanlandsverslunar 900-2010. Verkið er í tveimur bindum, alls um 1000 síður. Þar er í fyrsta sinn sögð heildarsaga íslenskrar utanlandsverslunar frá landnámstíð til okkar daga. Fjallað er um framandi kaupmenn og fátæka landsmenn, harðan fisk og mjúka ull, mjöl og öl, brennivín og bjór, við og vax, lýsi og smjör, freðfisk og ál, nauðsynjar og neysluvenjur og ótalmargt fleira. Höfundar eru sex sagnfræðingar við Háskóla Íslands, þau Anna Agnarsdóttir, Gísli Gunnarsson, Guðmundur Jónsson, Halldór Bjarnason (d. 2010), Helgi Skúli Kjartansson og Helgi Þorláksson. Ritstjóri er Sumarliði R. Ísleifsson.