Við segjum þetta gott úr Grósku. Blaðamannafundi er lokið en viðtöl við oddvita flokkanna eru væntanleg á mbl.is.

„Ég skal bara taka þetta á mig,“ sagði Dagur þegar hópurinn er spurður hvort gleymst hafi að láta húsráðendur í Grósku vita af fyrirhuguðum blaðamannafundi.

Segist hann hafa leitað til framkvæmdastjóra Vísindagarða og talið hópinn hafa verið með fullt leyfi til fundarins.

Bað hann um leið framkvæmdastjóra Grósku afsökunar, en sá hafði komið af fjöllum þegar fjölmiðlafólk bara að dyrum í húsinu og gerði sig til reiðu fyrir blaðamannafund.

„En það er dásamlegt að vera í þessu húsi, sem er miðstöð íslenskrar og reykvískrar nýsköpunar,“ sagði Dagur.

Dóra Björt gantaðist þá og sagði að það gæti komið til skoðunar að þetta verði einhvers konar almenningstorg, þar sem fólk geti komið og haldið blaðamannafundi.

Einar Þorsteinsson segir verkefni að mynda meirihluta en búið sé að útiloka ýmis mynstur. Myndun hans verði þó gerð í kringum málefnin.

Einar Þorsteinsson vildi lítið tjá sig um borgarstjórastólinn en hann var spurður hvort það kæmi til greina að einhver annar en hann eða Dagur myndi skipa það embætti.

Hann sagði þó málefnin ráða för.

Spurður af hverju hann hafi ekki íhugað að leita til vinstri eftir kosningarnar segir Dagur að þau hafi verið nývöknuð að morgni sunnudags þegar flokkar byrjuðu að útiloka ýmsa hluti.

Hann kveðst fagna því að Framsókn komi aftur inn í borgarstjórn.

Þessi staða hafi teiknast upp og styrkur þessa hóps felist í breiðu pólitísku litrófi.

Dóra Björt segir ekki tímabært að ræða einhver „óskahlutverk“ flokksins. Málefnin séu í forgrunni og annað verði rætt síðar. Hefur hún fulla trú á að ásættanleg niðurstaða náist.

Spurð hvort ekki sé einum ofaukið í viðræðunum, þar sem um sé að ræða þrettán manns þegar aðeins þurfi tólf, og hvort Þórdísar Lóu sem fulltrúa Viðreisnar sé þörf, segir Dóra Björt að fjórir flokkar hafi gefist vel í viðræðunum.

Hún telji það gagnlegt, uppbyggilegt og lýðræðislegt. Rúmur meirihluti tali í umboði fleiri íbúa og í þágu fleiri íbúa.

Dagur B. Eggertsson segir alla flokkana hafa sett fram skýra stefnuskrá og víða sé málefnaleg samleið. Flokkarnir muni í sameiningu setja fram vinnuáætlun og kvíðir hann því alls ekki. Þetta séu að vísu ekki eins flokkar, heldur fjórir flokkar með mismunandi áherslur.

Spurður hvort erfitt sé gagnvart kjósendum að ganga til viðræðna við flokka sem voru í meirihlutanum, eftir að hafa lofað breytingum, segir Einar að kosningarnar hafi snúist að mestu um húsnæðis- og velferðarmál.

Hann telji ekki skynsamlegt að setja fólkinu hinum megin við borðið einhverja afarkosti um að Framsókn fái borgarstjórastólinn.

Mikilvægt sé að tala um málefnin fyrst og svo verkaskiptingu.

Þórdís Lóa segir Viðreisn frekar vera miðjuflokk heldur en hægri- eða vinstriflokk. Málefnin hafi ráðið för í ákvörðun um að ganga inn í þetta bandalag.

Dagur segir flokkana hafa sammælst um að ræða málefnin fyrst og verkaskiptingu í lokin, spurður hvort til greina komi að hann sitji ekki sem borgarstjóri á kjörtímabilinu.

Þórdís Lóa segist reiðubúin í breytingar í borginni. Nú sé nýtt upphaf og nýtt kjörtímabil.

Um sé að ræða viðræður um nýjan meirihluta.

Dagur tekur fram að segja megi að viðræður um myndun meirihluta hafi tekið óvenju langan tíma að fara af stað.

Segist telja að í flóknu landslagi hafi þurft þennan tíma.

Kveðst mjög ánægður og bjartsýnn. Hann hlakki til að verja næstu dögum með þessu ágæta fólki, í að tala um borgina.

Þórdís Lóa segir Viðreisn sátt og ánægð með að vera komin á þennan stað.

Næstu dagar muni leiða í ljós hvernig þeim gengur. Hún hafi fulla trú á að þeim muni ganga vel.

Hún segir sömuleiðis að málefnalegur þéttleiki sé mjög mikill, eftir að hafa lúslesið stefnur flokkanna.

Dóra Björt Guðjónsdóttir oddviti Pírata segir flokkinn ánægðan með að vera kominn á þennan tímapunkt. Hún hefur fulla trú á að viðræður gangi vel og er spennt fyrir næstu dögum.