Charles Michel, forseti leiðtogaráðs Evr­ópu­sam­bands­ins tísti rétt í þessu þar sem hann vottaði bresku konungsfjölskyldunni og öllum þeim sem syrgja hennar hátign samúð sína.

„Eitt sinn kölluð Elísabet hin staðfasta, brást hún aldrei í að sýna okkur mikilvægi þeirra gilda sem vara í nútímasamfélagi,“ sagði Michel.

Karl mun bera titilinn Karl III. Bretakonungur.

Emmanuel Macron Frakklandsforseti vottaði drottningunni virðingu sína í tísti rétt í þessu. Sagði hann drottninguna hafa verið „Frakklandsvin“ sem sett hafi mark sitt á bresku þjóðina sem og öldina alla.

Elísabet var aðeins 14 ára gömul þegar hún flutti sitt fyrsta ávarp. Þá ávarpaði hún börn og hvatti þau til að vera hugrökk í seinni heimstyrjöldinni.

Elísabet II. Bretadrottning gaf það skýrt til kynna í yfirlýsingu í tilefni af 70 ára drottningarafmæli sínu í febrúar á þessu ári að Kamilla hertogaynja, eiginkona Karls þáverandi prins og núverandi konungs, myndi fá drottningartitil.

Áður var talið að Kamilla fengi aðeins titil prinsessu.

Þjóðsöngur Bretlands breytist þegar konungur tekur við. Bretar syngja því nú: „God Save the King“ í stað „God Save the Queen“.

Öllum reikningum bresku konungsfjölskyldunnar hefur verið breytt í samræmi við reglur. Þeir eru nú allir með svarthvítum myndum af drottningunni.