Þau pósthús sem voru lokuð vegna veðurs fyrri hluta dags verða opnuð aftur klukkan 13.

„Miðað við spána var ekki stætt á öðru en að gera þetta svona,“ segir Rögnvaldur Ólafsson, aðalvarðstjóri hjá Almannavarnadeild, um rautt viðvörunarstig á höfuðborgarsvæðinu í morgun sem hefur haft mikil áhrif á þjóðfélagið. Hlýrra sé en gert var ráð fyrir sem hafi hjálpað mikið.

Gunnar Örn Jónsson lögreglustjóri á Norðurlandi vestra segir heldur að bæta í veðrið í landshlutanum og að það sé þegar orðið alveg „gufuvitlaust veður“ í austanverðum Skagafirði, handan Héraðsvatna.

Mikill sjór hefur flætt á land á Reykjanesi, ekki síst við Ægisgötu í Keflavík og í Garði í Suðurnesjabæ þar sem allt er á floti.

Í nótt fauk hluti af þaki á fjölbýlishúsi við Jörfagrund á Kjalarnesi. Hanna Sigurrós Helgadóttir býr í íbúðinni á efri hæðinni þar sem þakið skemmdist. Í samtali við mbl.is segir hún að þar sem veðrið sé enn brjálað og fólk vogi sér varla út sé erfitt að segja til um nákvæmar skemmdir.

Strætóskýli fauk af sínum stað fyrir utan sundlaugina á Seltjarnarnesi þegar óveðrið gekk yfir í morgun.

Vindur er nú að ganga niður á höfuðborgarsvæðinu eins og spár gerðu ráð fyrir. Appelsínugul viðvörun tók gildi kl. 11 og rennur hún út kl. 14 eins og gefið var út í gær.

Aðstæður á Suðurlandi eru að skána og eru vinnuflokkar frá Rarik farnir af stað í bilanaleit í Árnessýslu, en enn er erfitt að komast til vinnu í Rangárvallasýslu og Skaftafellssýslu.

Ýmis starfsemi hefur legið niðri á höfuðborgarsvæðinu og víðar á landinu í morgun. Skólahald hefur nánast alfarið legið niðri, og það á öllum skólastigum, frá leikskóla upp í háskóla.

Borgarfulltrúinn Líf Magneudóttir fer að öllu með gát í óveðrinu sem nú gengur yfir landið. Líf birti mynd á Twitter þar sem hún hefur komið grillinu sínu fyrir inni í stofu.

Búið er að opna Reykjanesbraut og Grindavíkurveg. Enn er þó bálhvasst og hálka og hálkublettir á vegunum og hvetur lögregla vegfarendur til að sýna aðgát og fara varlega.

Björgunarsveitarmenn voru kallaðir að Öldugötu í Hafnarfirði í morgun. Tilkynning hafði borist um að þak hefði fokið í heilu lagi af skúr.

Morgunninn hefur verið með rólegra móti hjá leigubifreiðaþjónustum höfuðborgarsvæðisins. Hjá Hreyfli hefur verið mun minna að gera en á venjulegum degi.

Strætó á höfuðborgarsvæðinu mun hefja akstur á nýjan leik í kringum klukkan 11:30 til 12 í dag.