Matur | mbl | 9.9.2019 | 18:37

Þorskur í sparifötum

mbl.is/Colourbox

Það er talað um að borða að minsta kosti 350 grömm af fiski á viku. Hér bjóðum við upp á frábæran þorsk, vafinn inn í parmaskinku sem gerir réttinn aðeins sparilegri. Það má svo sannarlega leyfa sér þetta í miðri viku.

Þorskur í sparifötum (fyrir 2)

300 g þorskur eða annar álíka
80 g parmaskinka
ólífuolía
2 stór hvítlauksrif, skorin í þunnar skífur
2 skalottlaukar, smátt skornir
300 g litlir tómatar
2 msk. kapers
½ dl hvítvín
2 msk smjör
salt og pipar
smátt söxuð steinselja
gott brauð

Aðferð:

Skiptið fiskinum í fjóra bita. Rúllið parmaskinku utan um fiskinn og steikið upp úr olíu á heitri pönnu.
Setjið hvítlauk og skalottlauk út á pönnuna ásamt tómötum í heilu lagi og steikið í stutta stund.
Setjið kapers og hvítvín út á pönnuna og leyfið suðunni að koma upp. Smakkið til með smjöri, salti og pipar. Fiskurinn þarf ekki nema 3-5 mínútur til að verða gegnumsteiktur.
Toppið með steinselju og berið strax fram með góðu brauði.