“Monkeybread” eða apabrauð er eitthvað sem er afar vinsælt í Bandaríkjunum. Það er oft bakað í kökuformi og síðan hvolft eða það er bakað í eldföstu formi líkt og hér er sýnt. Það er engin önnur en Berglind Hreiðars á Gotteri.is sem á heiðurin að þessari snilldar uppskrift.
Apabrauð
Deig
- 460 g hveiti
- 50 g sykur
- 1 pk þurrger
- 1 tsk. salt
- 180 ml mjólk
- 60 ml vatn
- 60 g smjör
- 1 egg
Aðferð:
- Hrærið saman hveiti, sykri, þurrgeri og salti.
- Bræðið smjörið í potti og hellið vatni og mjólk saman við þar til blandan velgist, varist þó að hún verði of heit fyrir gerið.
- Hellið smjörblöndunni saman við þurrefnin og byrjið að hnoða með króknum eða í höndunum, bætið egginu saman við.
- Það gæti þurft að bæta örlitlu af hveiti saman við ef deigið er of klístrað en setjið þá aðeins eina teskeið í senn.
- Þegar búið er að hnoða deigið vel saman má setja það í skál sem búið er að pensla með matarolíu, leggja viskastykki yfir og leyfa því að hefast í um 15 mínútur á meðan þið gangið frá og útbúið hjúpinn.
Hjúpur
- 115 g smjör
- 140 g sykur
- 60 g púðursykur
- 1 msk. kanill
- Bræðið smjörið og hellið í skál.
- Hrærið saman báðum tegundum af sykri og kanil í aðra skál og leggið til hliðar.
Glassúr
- 80 g rjómaostur við stofuhita
- 30 g brætt smjör
- 220 g flórsykur
- 1 tsk. vanilludropar
- 2 msk. mjólk
- Hrærið rjómaost og smjör saman.
- Bætið flórsykrinum saman við og því næst mjólk og vanilludropum.
- Hrærið þar til slétt og fellt.
Aðferð
- Rúllið deiginu í lengju, skiptið í 35-40 bita og rúllið í litlar kúlur.
- Smyrjið eldfast mót vel með smjöri.
- Rúllið hverri deigkúlu upp úr bræddu smjöri og síðan sykurblöndunni og raðið þeim óreglulega í formið. Gott er að nota ekki of stórt eldfast mót til þess að ná tveimur hæðum af kúlum, það gerir þetta enn girnilegra.
- Leggjið viskastykki laust yfir og leyfið kúlunum að hefast í um 45 mínútur (þær ættu nánast að tvöfalda stærð sína).
- Bakið við 180°C í um 25-30 mínútur eða þar til kúlurnar verða vel gylltar.
- Leyfið „apabrauðinu“ aðeins að kólna á meðan þið útbúið glassúrinn en því næst má dreifa honum óreglulega yfir og hafa afganginn í skál til hliðar til að hver og einn geti skammtað sér af vild.
Ljósmynd/Berglind Hreiðarsdóttir
Eldfasta mótið hefur vakið athygli en það fæst í Rúmfatalagernum.
Ljósmynd/Berglind Hreiðarsdóttir