Matur | mbl | 19.11.2019 | 13:34

Ómótstæðilegur kjúklingaréttur með austurlensku ívafi

Ljósmynd/Snorri Guðmundsson

Hann Snorri Guðmundsson hjá Matur & myndir tekur óheyrilega fallegar matarmyndir og ekki spillir fyrir að maturinn er svo girnilegur að það hálfa væri nóg. Við skorum á þig að lesa þessa uppskrift í gegn og reyna svo að hafa eitthvað annað í kvöldmat. Það er erfitt því þessi réttur hljómar ómótstæðilega eins og Snorra einum er lagið.

Ofnbökuð tikka kjúklingalæri með túrmerik hrísgrjónum

Fyrir 3-4:

800 g kjúklingalæri (skinn og beinlaus)
4 tsk. tikka masala krydd frá Kryddhúsinu
1 laukur
1 dós (400 g) kókosmjólk (hér er mælt með Thai Choice kókosmjólkinni)
1 teningur af kjúklingakraftir
2 tsk. fenugreek frá Kryddhúsinu (mjög gott en má sleppa)
1 msk. hunang
8 g kóríander
30 g kasjúhnetur
2 dl basmati hrísgrjón
1 tsk. túrmerik frá Kryddhúsinu

Aðferð:

Setjið kjúklingalærin í skál með svolítilli olíu, Tikka Masala kryddi og 1 tsk af salti. Blandið vel saman og leyfið að marinerast í svolitla stund.
Hrærið saman kókosmjólk, Tikka Masala kryddmauk, kjúklingakraft, hunang og fenugreek.
Setjið 3 dl af vatni í lítinn pott ásamt túrmerik og svolitlu salti og náið upp suðu. Bætið hrísgrjónum út í pottinn, náið aftur upp suðu og lækkið þá hitann svo það rétt kraumi í. Látið malla undir loki í 14 mín, takið pottinn svo af hitanum og látið standa undir loki í 10 mín.
Hitið ofn upp í 200 °C með blæstri. Skerið lauk í strimla og veltið honum upp úr smá olíu.
Dreifið kjúklingalærunum yfir stórt eldfast mót, dreifið lauknum svo yfir og bakið í miðjum ofni í 18 mín. Hellið sósunni yfir og meðfram kjúklingalærunum og bakið áfram í 20-25 mín
Saxið kóríander og grófsaxið kasjúhneturnar. Dreyfið hnetum og kóríander yfir réttinn þegar hann kemur úr ofninum.
Berið fram með hrísgrjónum, mangó chutney og naan brauði.