Þegar veislutíðin stendur sem hæst er gott að eiga hauk í horni sem getur bjargað málunum á meistaralegan hátt. Veisluþjónustan Veislulist er mögulega elsta veisluþjónusta landsins og hefur verið rekið af sömu aðilunum frá stofnun. Fyrirtækið fagnar 45 ára afmæli á næsta ári og geri aðrir betur.

Fyrirtækið er eins hafnfirskt og hugsast getur en það voru þau Birgir Pálsson matreiðslumeistari og Eygló Sigurliðadóttir sem stofnuðu fyrirtækið, en synir þeirra, þeir Birgir Arnar matreiðslumeistari, Sigurpáll Örn matreiðslumaður og Ómar Már rekstrarfræðingur, hafa tekið við rekstrinum hin seinni ár og sjá núna um allan rekstur.