Matur | Jólauppskriftir KYNNING | mbl | 13.12.2024 | 6:30

Smjörsprautað kalkúnaskip að hætti Helgu Möggu

Helga Margrét Gunnarsdóttir deilir með lesendum girnilegri uppskrift af sætkartöflumús sem hentar vel með kalkúnaskipinu sem hún gerir á jólum. mbl.is/Eyþór

„Við fjölskyldan erum alltaf með kalkún á jólunum og yfirleitt er það smjörsprautaða kalkúnaskipið frá Hagkaup sem verður fyrir valinu. Það er fljótlegt og einfalt enda er oft mikið að gera á heimilinu með þrjú börn. Meðlætið er misjafnt hjá okkur en ég er yfirleitt með sætkartöflumús og svo er fyllingin ómissandi,“ segir Helga Margrét Gunnarsdóttir næringarþjálfari sem deilir hér skemmtilegum hollum uppskriftum fyrir jólin.

Uppskrift Helgu Margrétar að humar í eplarjómasósu sem gott er að hafa í forrétt með smjörsprautaða kalkúnaskipinu má sjá hér.

Uppskrift Helgu Margrétar að rjóma/skyrís með þristakökudeigi sem gott er að hafa í eftirrétt má sjá hér.

Helga Margrét er með skemmtilegt matarborð sem snýr að eldhúsinu, þar sem hún hefur mjög gaman af því að vera. mbl.is/Eyþór

Girnilegt kalkúnaskip sem er smjörsprautað fæst í Hagkaup og er mjög einfalt að elda það. mbl.is/Eyþór

Kalkúnaskip

2 kg kalkúnaskip úr Hagkaup
1 ferna brún sælkerasósa frá Íslandssósum
1 bréf Tasty-kalkúnasósugrunnur
1 teskeið dijonsinnep

Aðferð:

Kalkúnaskipið er einfalt í eldun og mælt með því að elda það í lokuðu fati.
Gott er að skafa kryddsmjörið af sem verður eftir í umbúðunum og smyrja því á kalkúninn. Hann er eldaður eftir leiðbeiningum á pakkanum í 45 mín á kíló.
Ég er oftast með um 2 kg fugl og þá finnst mér óþarfi að ausa yfir hann meðan á elduninni stendur, aðeins um 1,5 klst., en ef ég er með þyngri og stærri fugl er ágætt að ausa smá af því sem lekur af honum einu sinni meðan á elduninni stendur.
Ég er með einfalda sósu; 500 ml tilbúna sælkerasósu sem ég blanda saman við Tasty-kalkúnasósugrunn. Set helminginn af grunninum, blanda honum saman við 200 ml af vatni. Mjög gott að blanda smá dijonsinnepi saman við.

Fallegt salat sem meðlæti, sem má setja upp eins og aðventukrans. mbl.is/Eyþór

Fyllingin setur alltaf punktinn yfir i-ið þegar kemur að jólamatnum. mbl.is/Eyþór

Fylling

„Ég veit ekki hvaðan þessi uppskrift kemur, en ég er með hana skrifaða á miða hér heima. Ég hef búið hana til á hverju ári undanfarin 13 ár eða svo.“

150 g beikon í sneiðum
100 g smjör
2 laukar, saxaðir
1-2 sellerístönglar, saxaðir
1 stórt brauð
100 g pekanhnetur, grófsaxaðar
1 tsk salvía, þurrkuð eða fersk
½ tsk. salt, ½ tsk pipar
2 egg
200 ml kjúklingasoð
½ tsk. timían

Aðferð:

Beikonið steikt þar til það er stökkt, það er svo skorið smátt.
Smjörið er á meðan brætt í potti. Laukur og sellerí steikt í smjörinu þar til það er orðið mjúkt.
Brauðið skorið í bita, skorpan skorin af, brauðbitum, hnetum, salvíu, timíani, pipar og salti bætt út í og öllu hrært saman.
Potturinn tekinn af hitanum og þetta látið kólna örlítið. Eggjunum og soðinu er svo blandað saman við.
Sett í eldfast mót og svo hitað áður en það er borið fram.
Ég geri þessa fyllingu oft á þorláksmessu, það kemur svo dásamlegur ilmur í húsið. Einnig er hægt að gera hana með meiri fyrirvara og frysta.

Sætkartöflumús hentar sérstaklega vel með kalkúni á jólum. mbl.is/Eyþór

Sætkartöflumús

1 stór sæt kartafla 7-800 g
50 g rjómaostur
2-3 msk. hunang
1 tsk múskat
salt og pipar

Aðferð:

Kartaflan afhýdd og gufusoðin þar til hægt er að stinga gaffli í gegnum hana, um 25 mínútur. Það er hægt að stappa kartöflurnar í skál og blanda svo öllum innihaldsefnunum saman við eða nota blandara eða töfrasprota í verkið.

Þessar uppskriftir, sem og aðrar, má finna í blaðinu Hátíðarmat frá Hagkaup.