Margir eru forvitnir að sjá nákvæma dagskrá hjá atvinnumönnunum. Hér kemur dagurinn í gær. 

Vaknað  kl 06:15 og borðaður morgunmatur, oftast banani,all bran, kaffi og djúsglas.

Sundæfing kl 07:00-8:30. Þó allir séu  að synda 1500 m -3800 metra í keppni þá er á æfingum lögð mest áhersla á 25  metra og 50 m spretti.  Spaðar og kafarabelti (án lóða) eru  einnig mikið notuð. Í gærmorgun var aðalsettið 50  x 25 metrar eins hratt of þú getur með  5 sek hvíld á milli -  12 x 100 m með spöðum með 10 sek hvíld og  svo 30 x 50 metrar með spöðum 5  sek hvíld. Með upphitun samtals 5200 m. Hann henti mér og tveimur öðrum "nýliðum" upp úr eftir 4000 m.  

Kl  9:00 aftur morgunmatur. Hafragrautur, músli, egg,  ávextir og  hrein jógúrt. 

Kl  9:30-10:45 Hvíld - flestir leggja sig í hálftíma, hlaupa í kjörbúðina og fá  sér svo ávexti fyrir næstu æfingu. Mikill fengur fyrir þessa matvörubúð að  hafa svona  átmaskínur í bænum!

Kl  11:15 Brekkusprettir á hjóli. Brekkan hérna efst í  bænum er nánast lóðrétt og menn eru að klifra hana 10 sinnum sem tekur um 4  mínútur og hvíla svo með því að renna aftur niður. Með upphitun og kælingu  samtals 90 mín. Í lokin stutt ísbað í brunninum við botninn á brekkunni.

Kl: 13:00  Hádegismatur. Heill poki af salati, afgangar frá  deginum áður, 2  rúnstykki með  kjötáleggi og kotasælu. Rauðrófusaft og kirsuberjasaft er drukkið eins og vatn.

Kl 13:45-15:00 Hvíld - flestir  leggja sig. 

Kl 15:30  2-3  tímar "steady"  á hjólinu.Strákarnir fór 75 km, stelpurnar 55 km. Allar hjólaleiðir eru svo hæðóttar að það eitt að hjóla þettabyggir upp mikinn styrk en alla þessa viku voru engar sérstakar hraðaæfingar áhjólinu heldur fóru þær hraðaæfingar fram í lauginni og á hlaupabrautinni.

Kl  18:30 Snarl - sána  - teygjur. 

Kl 19:30 Kvöldmatur. Oftast er eldað heima, bara eitthvað einfallt t.d tómat pasta með túnfisk eða kjúkling, fullt af spínati og grænmeti. Ef það er borðað úti þá pantar fólk sér 2 rétti t.d steik og heila pítsu og stórt salat með baunum. Ég  get borðað flesta karlmenn undir borðið en ég var eins og spörfugl við hliðin á  þessum stelpum. Það sem kom mér mest á óvart er að flestir fá sér 1-2 vínglös með matnum, en aldrei meira en það. Sem sagt allt er gott í hófi.

Kl  21:00 Heitt súkkulaði með rjóma og svo háttatími. Það  var ekki beint partýstemming  en þegar íþróttafólk æfir  í þessu  magni og í þessum aðstæðum dag eftir dag þá er uppsöfnuð þreyta mikil. Líkaminn  endurnýjar sig best með svefni og þeir sem ekki eru duglegir að leggja sig brenna víst fljótt út. Það er komin tími á mig að halda heim. Þessi dvöl er búin að vera á við ansi mörg þjálfaranámskeið og ég kem heim reynslunni ríkari fyrir ykkur hin :-)