Sunnudaginn 6. júní var síðan haldið í alvöru reiðhjólaferð. Fyrst var haldið að Kleifarvatni og þaðan að grunni Krýsuvíkurkirkju, en hún brann til grunna 2. janúar s.l. (27 km). Þaðan héldum við síðan áleiðis til Grindavíkur en beygðum síðan inn á Vigdísarvallaveginn og hjóluðum hann allt norður í Vatnsskarð þar sem komið er á malbikið á Krýsuvíkurveginum og heim til Hafnarfjarðar. Alls voru þetta 72 km og Vigdísarvallavegurinn var ójafn svo ekki sé meira sagt svona í upphafi sumars.
ÞETTA VAR UNDIRBÚNINGURINN ÞVÍ NÚ HÓFST ANNAR UNDIRBÚNINGUR NEFNILEGA UNDIRBÚNINGURINN FYRIR 60 ÁRA AFMÆLIÐ SEM FÓR FRAM 22. JÚNÍ.
Hjólin voru því ekki hreyfð fyrr en 26. júní að öðru leyti en því að Sigurjón fór þrjár 25 km æfingaferðir suður Krýsuvíkurmalbikið. Laugardagsmorguninn 26. júní hlóðum við á hjólin svefnpokunum okkar, tjaldinu, príumusnum ofl. og lögðum við af stað í rigningu frá heimili okkar að Austurgötu 40 í Hafnarfirði í ferðalagið hring um Ísland sem við höfum kosið að kalla Tour d´Islande til aðgreiningar frá hinni frægu reiðhjólakeppni Tour d´France. Í vikunni á undan höfðum við keypt töskur á hjólin, púðabuxur ofl. ásamt skærgulum reiðhjólajökkum sem við álítum okkar bestu slysavarnarfjárfestingu á reiðhjóli. Leiðin lá að Litlu Kaffistofunni í Svínhrauni sem var fyrsta stopp og fengum við þar gott heitt kakó og heimasmurt brauð eins og það gerist best á þessum vinsæla veitingastað þar sem móttökur gestgjafa eru með því hlýjasta sem gerist. Frá Litlu Kaffistofunni var síðan haldið austur Svínahraun og þar þrengir heldur betur að reiðhjólamönnum þar sem vegurinn er mjög mjór og umferðin gengur hratt fyrir sig. Vorum við þarna líklega í einni mestri lífshættu alla ferðina. Við fórum síðan Þrengslin og niður að Þorlákshöfn. Yfir Ölfusá á brúnni og síðan upp á Selfoss. Samtals 71 km fyrsta daginn.