Húsnæði að Bankastræti 5, sem lengi hefur hýst vinsæla skemmtistaði borgarinnar, er laust til leigu.
Í glugga húsnæðisins segir að um sé að ræða tækifæri í rekstri en síðustu þrír rekstraraðilar hússins hafa verið þar með skemmtistað.
Lokað að beiðni skattayfirvalda
Nú síðast var þar til húsa skemmtistaðurinn b5 en honum var lokað af lögreglu 26. apríl að beiðni skattayfirvalda.
Í kjölfarið sendi Sverrir Einar Eiríksson, veitingamaður og eigandi skemmtistaðarins, frá sér yfirlýsingu þar sem hann sagðist ekki af baki dottinn og að staðurinn yrði opnaður á ný. Aldrei fór þó svo og eins og fyrr segir er húsnæðið laust til leigu.
https://www.mbl.is/frettir/innlent/2024/04/26/ekki_af_baki_dottinn_og_aetlar_ad_opna_b5_aftur/
Húsnæðið lengi hýst vinsæla skemmtistaði
Birgitta Líf Björnsdóttir, markaðsstjóri World Class, er meðal þeirra sem hefur rekið skemmtistað í húsnæðinu. Var það áður en Sverrir Einar tók við og gekk staðurinn undir nafninu Bankastræti Club.
https://www.mbl.is/smartland/stars/2023/06/13/birgitta_lif_haett_med_bankastraeti_club/
Sverrir Einar tók við rekstrinum í júní á síðasta ári og var markmiðið þá að endurvekja stemninguna sem var áður í húsinu þegar þar var rekinn skemmtistaðurinn b5.
Margir kannast við nafnið b5 enda var staðurinn til húsa við Bankastræti 5 í mörg ár áður en staður Birgittu Lífar tók við. Reksturinn gekk þó erfiðlega þegar strangar samkomutakmarkanir voru í gildi í heimsfaraldri Covid-19 og var skemmtistaðnum á endanum lokað.
Sverrir varð þó að breyta nafninu á staðnum í B í kjölfar þess að lögbann var lagt á notkun heitisins b5 þar sem heitið reyndist í eigu einkahlutafélags.
https://www.mbl.is/frettir/innlent/2024/01/18/tekur_b5_heitid_aftur_i_notkun/