Íslenska U20 ára karlalandsliðið mun keppa við jafnaldra sína frá Noregi um sjöunda sætið á Evrópumótinu í handknattleik eftir tap fyrir Svíþjóð, 30:27, í Celje í Slóveníu í dag.
Fyrr í dag tapaði Noregur fyrir Austurríki og munu því Austurríki og Svíþjóð berjast um 5. sætið.
Svíar voru fimm mörkum yfir í hálfleik, 18:13, en í seinni hálfleik kom íslenska liðið sér aftur inn í leikinn.
Ísland minnkaði muninn minnst í eitt mark en Svíar voru sterkari á lokasprettinum og unnu leikinn.
Hjá Íslandi skoruðu Andri Fannar Elísson og Reynir Þór Stefánsson fimm mörk hvor. Atli Steinn Arnarson og Eiður Rafn Valsson skoruðu þá þrjú mörk hvor.