Róbert Aron Magnússon, maðurinn bak við Götubitahátíðina, heimsótti þau Kristínu Sif og Þór Bæring í þættinum Ísland vaknar en hátíðin fer fram í sjötta skipti í Hljómskálagarðinum um helgina.
Þriðja stærsta hátíð landsins
„Þetta er búið að fara vaxandi ár frá ári og í fyrra fengum við sem sagt vel yfir 50.000 manns,“ segir Róbert og útskýrir að hátíðin sé þar af leiðandi sú þriðja stærsta á landinu og stærsti matarviðburðurinn á Íslandi
„Enda eru þetta yfir þrjátíu söluaðilar sem verða á hátíðinni,“ segir hann þá en þar af selja 26 bara mat. Nefnir hann að svo sé einnig boðið upp á bjór, kokteila og ýmis konar leiktæki og afþreyingu fyrir yngstu kynslóðina.
Keppast um titil besta götubitans
Róbert nefnir að á Götubitahátíðinni sé keppt um titil „Besta götubita Íslands 2024” og að sigurvegarinn keppi fyrir Íslands hönd á European Street Food Awards. Kveðst hann sjaldan hafa séð jafn mikinn metnað meðal þátttakenda og í ár.
„Það ætla allir að taka titilinn hans Silla,“ segir hann en Sigvaldi Jóhannesson, betur þekktur sem Silli kokkur, hefur unnið íslensku keppnina undanfarin fjögur ár.
https://www.mbl.is/matur/frettir/2024/07/08/vinnur_silli_kokkur_aftur_fyrir_besta_gotubitann/
Heldur Róbert áfram að lýsa spennandi viðburði þar sem allir geta fundið eitthvað við sitt hæfi en heyra má viðtalið í heild sinni í spilaranum hér fyrir neðan.