Style Technology ehf., hefur um árabil framleitt og selt fiskflokkunarvélar fyrir uppsjávarfisk og rækju til 24 landa. Egill Ragnarsson forstjóri segir aðspurður að það hafi tekið tvö ár að metta markaðinn á Íslandi, þar sem allar íslenskar fiskvinnslur hafi keypt nýju flokkunarvélarnar þegar þær komu á markaðinn.  

„Í framhaldi af því keypti íslenski fiskiflotinn vélar af okkur og það tók tvö ár að metta þann markað. Við þurftum að leita út fyrir landsteinana og fara að selja og afla nýrra markaða erlendis. Noregur er næst okkur og svo kom Kanada og þetta endaði í 24 löndum alveg niður til Suður-Ameríku,” segir Egill. 

Hann segir aðspurður að vélarnar búi yfir þannig tækni sem gerir fiskvinnslum kleift að skipta um uppsjávartegund á nokkrum sekúndum, sem annað tók tvo tíma að gera.  

„Hér áður tók það fiskvinnslur tvo tíma að skipta úr síld yfir í makríl. Framleiðslan er oft þannig að síld er keyrð í gegnum vinnsluna fyrir hádegi og svo eftir hádegi er skipt yfir í makríl og það gat tekið töluverðan tíma að breyta vélbúnaðinum. Vélarnar okkar geta gert það á mjög skömmum tíma sem eykur framleiðslugetuna til muna,” segir Egill.