Á grunni vísindaráðgjafar Alþjóðahafrannsóknaráðsins (ICES) var á ársfundi Norðaustur-Atlantshafsfiskveiðiráðsins (NEAFC) samþykkt áframhaldandi bann við veiðum á karfa á Reykjaneshrygg.

„Rússland greiddi atkvæði, eins og hingað til, á móti þessu veiðibanni og mun líklega mótmæla reglunum formlega til að vera ekki bundið af þeim. Önnur aðildarríki munu framfylgja veiðibanninu og ýmsum reglum sem þrengja að stöðu þeirra rússnesku skipa sem taka þátt í veiðunum,“ segir í tilkynningu á vef stjórnarráðsins.

Rússar hafa um nokkurt skeið stundað karfaveiðar á Reykjaneshrygg þrátt fyrir bannið.

Samþykktu tillögu um karfaveiðar í Síldarsmugunni

Á fundinum, sem haldinn var í London 12. til 15. nóvember voru samþykktar verndunar- og stjórnunarráðstafanir fyrir norsk-íslenska síld, makríl, búrfisk (búra) og ýsu á Rockall-banka og gilda samþykktirnar fyrir árið 2025. Fram kemur að þær eru gerðar á á grundvelli nýjustu ráðgjafar ICES.

Framlengdar voru stjórnunarráðstafanir fyrir háf auk banns við veiðum á hámeri. Þá samþykktu öll aðildarríki tillögu um stjórn karfaveiða í Síldarsmugunni eftir ósamkomulag til margra ára.

„Ekki liggur fyrir samkomulag varðandi veiðar úr deilistofnunum norsk-íslenskri síld, kolmunna og makríl. Því nær ákvörðun ársfundarins eingöngu til sameiginlegs viðmiðunar heildaraflamarks, að ríkin skuli setja sér takmarkanir og að öðrum en aðildarríkjum sé óheimilt að veiða úr þessum stofnum á úthafinu,“ segir í tilkynningunni.

Greint er frá því að innrás Rússlands í Úkraínu hafi „að stórum hluta lamað starfsemi nefnda og vinnuhópa NEAFC. Á fundinum var því lögð áhersla á að finna leiðir til að auka virkni innan stofnunarinnar þrátt fyrir að önnur aðildarríki viðhaldi þeirri stefnu að eiga ekki í venjulegum samskiptum við Rússland vegna árásarstríðsins.“

Stefán forseti NEAFC

Á fundinum var Stefán Ásmundsson kosinn forseti NEAFC og mun hann gegna því hlutverki næstu tvö árin. Embættið gengur milli aðildarlanda NEAFC og tekur Stefán við af Janet Skarðsá frá Færeyjum sem verið hefur forseti síðastliðin fjögur ár.

Aðildarríki NEAFC eru Bretland, Danmörk – fyrir hönd Færeyja og Grænland, Evrópusambandið, Ísland, Noregur og Rússland. Ráðið fer með stjórn fiskveiða á úthafinu í Norðaustur-Atlantshafi.