Fjórir ferðamenn létust vegna metanóleitrunar eftir að hafa drukkið mengað alkóhól á vinsælum ferðamannastað í Laos, að því er talið er. 

Tveir danskir ríkisborgarar létust, einn Bandaríkjamaður og ung áströlsk kona.

Að sögn BBC voru Danirnir tvær konur, 19 og 20 ára. Létust þær í Laos í síðustu viku. 

Ferðamaður sem var með áströlsku konunni í för er í lífshættu, að sögn forsætisráðherra Ástralíu, Anthony Albanese.

Talið er að ferðamennirnir hafi orðið fyrir eitruninni er þeir voru úti á lífinu í bænum Vang Vieng.

Alls veiktust 12 ferðamenn, að sögn breskra og ástralskra fjölmiðla.